Busquets-a'n Covid-19 a kai

Euro 2020-a an match hmasa ber khel turin ni riat chiah a ngai tawh tihah Spain-in chanchin lawmawm lo hriat tur an nei a, captain Sergio Busquets chuan Covid-19 a kai.

Spain hian ruahman ang chuan zanin dar 12:15-ah hian Lithuania nen friendly match an khel dawn a, Euro 2020 an khelh hmaa an inpuahchahna match hnuhnung ber tur a ni.

Mahse, kum 32 mi Busquets-a'n Covid-19 a kai miau a, player dang zawng 'negative' vek mah se UEFA leh Spanish health ministry lam inkaihhruaina dan angin Spain player leh coaching staff zawng zawng chu an inkhunghrang nghal vek.

Spanish Football Federation (RFEF) chuan thuchhuah siamin Lithuania nena an inkhel tur chu Spain Under-21 zawkin an khelh mai tur thu an puang zui a, ticket hralh chhuah tawh chu kir leh theih a ni a, inkhel entlang duh tan a hma aia tlawmin a en theih bawk ang.

Euro 2020-ah Spain hi group E-ah an awm a, an match hmasa ber chu June 14 zan dar 12:30-ah Sweden nen an khel zui dawn.

Sweden zawhah hian Poland (June 19) leh Slovakia (June 23) an hmachhawn leh dawn a, chetsual theihna vek a nih avangin inbuatsaihna kal vung chhoh vang lai taka Covid-19 vanga inbuatsaihna khaihlak hi Spain tan chuan a ngeiawm khawp ang.