Taxi driver fapa Lee Chong Wei

"Thutlukna harsa leh hrehawm a ni a, ka nun leh badminton hi a inzawm tlat a, tunah chuan ka hriselna ka ngaih pawmawh ber a ngai ta si," tiin Lee Chong Wei chuan June 13, 2019 khan mittui nen badminton a chawlhsan thu a puang. Badminton player ropui bik hian hlawhtlinna tam tak chang mah se natna khirhkhan cancer vangin a duh aia hmain a chawlh a ngai.

Lin Dan nen an vanglai a in rual a, medal leh ropuina tam tak chu an inchan sem a ngai, an ropui tur angin an ropui tawk loah ngaih theih ni mah se an pahniha an awm dun hian badminton an ti hlu zual a, tennis khel thiam Roger Federer leh Rafael Nadal ang bawkin an inchhem alh tawnah a ngaih theih.

Infiammi hlawhtling ni turin hausak hmasak kher a ngai lo a, chutih rualin reithei tan kawng a awlsam bik tihna pawh a ni chuang hek lo. Theihna leh tumruhna neih a ngai a, siamtu hnen aṭanga chemkalna (talent) dawn tih pun thiam a ngai thung.

Lee Chong Wei hi October 21, 1982 khan Bagan Seria, Malaysia-ah a piang a, a pa chu taxi khalh ṭhin Lee Ah Chai niin, a nu chu innghaktu Khor Kim Choi a ni thung - chhungkaw khawsak nuamsa an ni bik lo tih chu a hriat theih.

A naupan lai chuan a ṭhiante nen basketball an khel ṭhin a, a infiamna ngainat ber pawh a ni ṭhin. Mahse, basketball court an inkhelh phak tawkna chu kawng sir leh ni sa hnuaiah a ni ṭhin; Chong Wei-a nu chuan ni sensa hnuaiah a fapa chu inkhelh reng a remti ta lo.

Badminton ngaina tak Lee Ah Chai-a'n a fapa Chong Wei chu daihlim hnuaiah badminton khel turin a hruai ṭhin a, kum 11 mi a nih aṭangin khawvelin a hmelhriatna tur chu a luhchilh a, kawng awlsam erawh a ni nghal lo, paltlang tur a tam.

Badminton court chhunga Chong Wei che vel chu tualchhung coach Teh Eng Huat-a'n a lo hmu fuh a, chher hriam tlak a nihzia a hmu. Ah Chai hnenah a fapa chu training pek a duh thu a hrilh a, mahse Chai-a chuan an sum neih lohzia ngaihtuah chungin a thiam ang tawkin a hnar.

Mahse, coach Teh Eng Huat-a'n a sawm ngawrh a, khawvel huap pawha ṭha tur a nih thu a hrilh bakah senso hautak lo leh a theih ang anga ṭanpui bawk tura insiamremin, player ropui zawk ni turin badminton khelh chu uluk leh kalphung pangngai zawka zirtir a ni.

Badminton nun bul ṭan saktu a pa Ah Chai leh coach hmasa Huat te hi Chong Wei-a'n hlawhtlinna a chan hnuah pawh a hre reng a, a tan nun bul ṭantu pawimawh an nihna a theihnghilh lo - khawvel badminton player ropui ber zinga mi chher chhuaktu an nihna a hai lo hle.

Inkhelh a thiam hnuah coach dang - Misbun Sidek, Li Mao leh Morten Frost te a hrawn leh a, anni pathum hi coach fing tak tak ni mah se an thiamna leh kaihhruai dan a inan loh thu a sawi, badminton player ṭha ni tur chuan kut mai bakah ke tha chak nei turin an chher a ni.

Badminton World Federation (BWF) hian kum 1980 bawr vel aṭang khan world ranking hi a kalpui ṭan a, legend Chong Wei hi a chung berah chawlhkar 349 chhung a awm thei! 2008 August 21 aṭanga 2012 June 14 inkarah phei kha chuan kar 199 chhung a zawnin pakhatna a ni.

A sulhnu leh lawmman enin a ropui a, sawi nep theih a ni lo. Amaherawhchu, ngam loh a nei - a hming chu Lin Dan a ni. Chinese tlangval hian a ropuina tur ber Olympic-ah a hliahkhuh.

London Olympic 2012 leh Beijing 2008-ah te khan final lut mah se Lin Dan hi a ngam lo a, Rio 2016-ah khan Chinese tlangval dang Chen Long a hneh lo bawk - silver medal pathum a dawn hi a ropui a, 

a duhthusam erawh a thleng thei ta bik lo.

Chong Wei chuan, "Lin hi ka rilruah a awm reng ṭhin, kan inkhelh hma leh inkhelh hnu pawhin kan intum leh huna ka khelh ṭhat theih dan tur hi ka ngaihtuah nasa thei hle. Badminton player ropui ber min zawt a nih chuan a chhanna chu Lin Dan a ni," tiin a sawi.

Player ropui pahnih hi vawi 40 an inhmachhawn a, Lin Dan-a'n vawi 28 hnehna changin Chong Wei hi ṭum 12 a chak ve thung. Badminton khawvelah chuan anni pahnih inelna aia ropui leh ngaihnawm dang hi a tam bik chuang lo.

Malaysian tlangval hian kum 19 badminton a khelh hun chhung khan match 839 a khel, chung zingah chuan vawi 705 a chak. Match a khelh tawh zinga a ngaihhlut leh hriatreng tlak an zawhnaah 2006 Malaysia Open final-a Lin Dan a hneh kha a nih thu a sawi.

Chong Wei chuan, "Lin Dan khan nomawi chawi turin point khat hmuh bak a mamawh tawh lo, vanneih thlak takin point sarih ka hmu zawn a, 20-20 a nih hnuah 23-21 in game ka la. Perpaduan Stadium-ah darkar khat leh minute 10 chhungin 21-18, 18-21, 23-21 in hnehna 

ka chang hram," a ti.

Chinese legend pawhin a elpui hi a dahsang let ve thung. Lin Dan chuan, "Ka hmelma a ni a, ka ṭhian ṭha a ni bawk. Inelna hautak leh ngaihnawm min chhawp chhuahsak a, kan hun hman dun apiang hi a hlu em em vek. Elpui hautak leh khirhkhan tak i nih avangin i chungah 

ka lawm," tiin Chong Wei chungchang a sawi ve bawk.

Malaysian infiammi zinga a hmasa ber ni turin Lee Chong Wei-a'n Olympic vawi ngaa inlan a tum, a kum tam deuh tawh mah se Tokyo Olympic khelh ngei tumin thapui a thawh.

Mahse, 2019 June 13 khan a hnar (nose) chu a cancer tih hriat chhuah a ni. Chong Wei chuan, "Ka kiangah a rawn kal a, ṭap chungin min kuah; chanchin ṭha lo tak a ni tih chu ka hre nghal mai.

"Hnar cancer a ni, tiin min hrilh a, badminton bag ka khai lai chu ka thlauh hnawk a, ṭhutthlengah ṭhuin ka ṭap zui," tiin a nupui Wong Mew Choo-i'n a natna chungchang a hrilh thu hi a sawi chhuak.

Natna khirh tak kai mah se Chong Wei a beidawng nghal lo, uluk taka enkawl a nih hnuah badminton court-a kir leh ngei a tum. Nikum tir lam khan training pawh a nei leh hman a, amaherawhchu cancer natna vangin All-England leh Malaysian Open khelh a tum pawh a ti hlawhtling thei ta lo.

Chong Wei chuan, "Ka taksa dinhmun a ṭha, tihrawl ka siam ṭha leh ang a, rilru lam a inpeih bawk chuan ka inkhel leh thei ang," tiin nikum March thla kha chuan a la sawi hram hram, beiseina nei mah se amah enkawltu doctor-in inkhelh a remti ta lo.

Inkhelh a chawlhsan hnuah pawh infiamna chu a mangṭha pumhlum vek lo. Infiamna khawmpui lian 2020 Summer Olympics-ah Malaysia tan 'chef de mission' atan ruat a ni a, inelna hi kumina neih tur ni mah se nakkumah sawn a ni a, a chanvo hlen turin kum khat a nghah rih a ngai dawn.