Sunil Chhetri goal hmangin India an chak

India-in Sunil Chhetri an mamawhzia a lang nawn leh ta a, Bengaluru FC forward goal hnih khung hmangin Bangladesh chu 2-0 in an hneh.

Chhetri-a'n goal hnih a khung avangin ram tan goal 74-a khung tling ta a, ram tana la khel mek player zingah Cristiano Ronaldo (103 goals) chu international football-a goal khung tam lama a phak loh awmchhun a ni. India-in hnehna an chan avangin pathumna ni chunga World Cup 2022 qualifier khar turin an dinhmun a ṭha leh ta sawt a, hmabak erawh a la awm.

Blue Tigers hian June 15 zanah Afghanistan an la hmachhawn leh dawn a, World Cup qualifier-a an match hnuhnung ber a ni nghal ang.

Team inthlau
Bangladesh lakah na na na chuan India hi inchhuang thei an ni a, FIFA ranking-ah pawh team pahnih an inthlau hle - India hi ranking-ah 105-na an ni a, Bangladesh hi 184-na an ni thung.

Team pahnih inthlauhna hi 79 a ni a, ranking san dan indawta din tur ni se Bangladesh hi chuan India an ko pha dawn lo tihna a ni. A tawi zawnga sawi chuan Bangladesh captain Jamal Bhuyan hian season hmasa khan Mohammedan SC tan I League a khel a, ISL khelh châk player a ni.

Thawhṭanni zan inkhelah pawh India-in Bangladesh an ngam a, inkhel ṭantir aṭangin an nawr nghal miah miah a ni ber - Udanta Singh, Brandon Fernandes leh Chhetri-ten chance duhawm nei vek mah se goal-ah an chantir thei lo.

Chhetri-a'n penalty beisei mah se pek a ni lo bawk a, uiawm ber erawh Chinglensana Singh-a ball tauh ṭha zet Bangladesh defender Riyadul Hasan Rafi-a'n goal line-a a lo dang hman chu a ni.

A tawpah Chhetri
India-in ball an chang tam a, chance pawh an ngah - a pawimawh ber goal erawh an khung thei lo. A tawpah India-in kum 36 mi Chhetri bawk a mamawh a, Indian striker hian a la tar lo tih pholan nan minute 79-naah goal-a rawn khung.

Bengaluru winger Ashique Kuruniyan chuan Chhetri tan ṭha zetin ball a thlawh phei a, Indian legend Chhetri hian mawi zeta lo tauh lutin India chu hma a hruaipui.

Minute tam zawk tlarhnunga bet chunga hun hmang Bangladesh-in tlarhnung ven reng ringawt chu thupuia neih chi a ni lo tih an hria a, nawr an tum - mahse, an thei lo.

Hun pek belh minute hnihnaah Chhetri bawk kan hmu nawn a, Manipur midfielder Suresh Wangjam-a ball pek chu harsat nei loin goal chung kil sirah a thlawh lut - Bangladesh tan thawh leh ngaihna a awm tawh lo a, India an chak.

Hmabak chu
Blue Tigers squad-ah Lallianzuala Chhangte leh Lalengmawia (Apuia) te awm mah se coach Igor Stimac-a'n Mizo tlangval pahnih a chhawr lo a, Mizo tel loin India an khel.

India hian table-ah pathumna dinhmun an luah mek a, pathumna ni chunga World Cup qualifier hi an khar a nih chuan AFC Asian Cup 2023 qualifier chu third round aṭangin an khel ṭan thei ang. Pathumnaa inelna khar tur erawh chuan India-in match tawp berah Afghanistan an hneh ngei ngei a ngai a, June 11 zana Oman-in Afghanistan an hneh phei chuan an match tawp berah draw result a tawk dawn.

Chutihrual chuan Afghanistan hian thil mak thlentira Oman an hneh a nih chuan India tan match tawp berah chak ngei ngei a ngai thung a, Bangladesh erawhin beisei tur an nei tawh lo.

Chuai thei lo Chhetri
Sunil Chhetri-a'n Bangladesh an hmachhawn hmain ram tan goal 72-a khung a; Argentine player ropui Lionel Messi nen an goal khung zat a inang - a chungah UAE forward Ali Mabkhout (73) leh Ronaldo (103) an la awm bawk.

Bangladesh nena an inkhelh zawh meuh chuan Chhetri-a'n Messi leh Mabkhout tlansanin ram tan goal 74-a khung tling ta a, ram tana la inkhel mek player zingah goal khung tam lama a tluk loh chu Ronaldo chiah a ni ta.

Chhetri-a'n international football-a goal khung hnem 10 zingah a hming a ziak kai ta bawk a, a kum tam ve deuh tawh mah se tuna a khelh dan en chuan ram tana goal khung tam lama pathumna ni mek, Hungarian striker ropui Ferenc Puskás (84) khuma a career khar turin chance a nei.

Kum 36 mi Chhetri hian rama tana goal 74 ngawt khung tur hian match 117 inlan bak a mamawh lo a, Indian football chanchinah chuan a hming a dai tawh mai mai lo ang.

Nikum aṭang tawh khan, "Chhetri hi chawl ta se, engtin nge ni ang?" tiin zawhna ka dawng fo a, training-na thleng pawh hian engtiklai pawhin kan player ṭha chungchuang ber a ni ziah a ni. - Igor Stimac, India coach

Hun rei zawk chu kan khel ṭha a, half chance pawh sawi tur kan nei nual. Mahse, Chhetri-te ang striker hi chance kan pe a nih chuan an khung mai ṭhin a, chu chu zaninah khan kan hmu. Minute 20 tawp lamah khan chance vawi hnih a nei a, a khung ve ve a ni. - Jamie Day, Bangladesh coach

Ka goal khung zat ka chhiar lo a, ka ngaihtuah hek lo. Inkhelh ka chawlhsan hnuahte chuan kan la sawi ve mahna. Chance kan hlah hnem hret a, kha aia ṭha zawka khel thei kha kan la ni. A tawpah erawh kan mamawh ber point thum kan hlawh chhuak a, kan hlim em em a ni. - Sunil Chhetri, India captain