Ukraine jersey-in Russia tithinrim

Euro 2020 khelh tur atan Ukraine chuan jersey thar an tichhuak a, an jersey-ah hian an ram map tilangin, Russia-in an ram chhunga an ngaih Crimea chu telh a nih avangin Russia mipui an thinrim hle.

Ukraine hian an jersey thara map-ah hian Crimea an telh bakah jersey hnung lamah, "Ropuina chu Ukraine ta a ni," tih inziak an tarlang tel a, a chhung lamah, "Mi huaisente chu chawimawiin awm rawh se," tih a inziak bawk - Ukraine-ah chuan he thu hi sipaiten chibai inbukna ṭawngkam atan an hmang ṭhin.

Russia chuan Crimea hi kum 2014 aṭang khan an ram chhunga awm angin an rin lut a, hei hi khawvelin a pawmpui lo thung.

European football-a thuneitu sang ber UEFA erawhin Ukraine jersey hi an pawmpui thu pholangin, "Ukrainian national team mai ni loin, Euro khel tur ram zawng zawng jersey hi UEFA chuan dan leh hrai uluk taka en chunga a pawm vek a ni," an ti.

Ukrainian Football Association president Andriy Pavelko chuan, "Ukraine hlimthla hian player-te chu he ram tana bei tur an nih avangin chakna a pek kan beisei a ni," a ti a, Ukraine khawpuia US embassy chuan Ukraine jersey thar chu nalh an tih thu twitter lamah an tarlang ve bawk.

Russian foreign ministry thupuangtu Maria Zakharova chuan, "Russia ram Crimea chu Ukraine-ah an rin lut a ni," tiin Ukraine chu a sawisel a, a tak ram thleng lo tur thil Ukraine chuan an buaipui thu a sawi.

Hetihlai hian Russian MP Dmitry Svishchev chuan Ukraine jersey chu, "Thil kalhmang a ni lo," tiin a sawisel a, UEFA chu a rang lama hma la turin a ngen bawk.

Ukraine hi Euro-ah hian group C-ah an awm a, Netherlands chu an match hmasa berah June 13-ah an hmachhawn ang a, North Macedonia (June 17) leh Austria (June 21) an hmachhawn bawk ang.

Euro hmaa an friendly match hnuhnung berah Ukraine hian Thawhṭanni zan khan Cyprus chu friendly match-ah 4-0 in an sawp a, Andriy Yarmolenko chuan penalty hmanga a khung bakah goal khat dang a khung a, Oleksandr Zinchenko (penalty) leh Roman Yaremchuk-te chuan goal khat ve ve an khung bawk.

Russia erawh group B-ah Belgium, Denmark leh Finland-te nen an awm ho a, an match hmasa ber chu June 12 zanah Belgium nen an khel ang.