Nadal ropui zanah Novak a vannei

French Open champion lai Rafael Nadal tan hna harsa thawh tur a la awm lo. World number 1 Novak Djokovic erawhin quarterfinal lut turin vanneihna a mamawh tel a, set hmasa pahnih a hloh hnuah huaisen takin a tho chhuak.

Nadal leh Djokovic te hian zaninah quarterfinal an khel zui dawn, an khingpui ve ve an hneh a nih chuan player ropui pahnih hi semifinal-ah an inhmachhawn thei dawn - final hmain pakhat zawk an tlak a ngai dawn tihna a ni.

Zirtirtu Nadal
'King of Clay' tiin a hminglem an phuahsak hial a, hei hian a nihna tak a phawk chhuak ṭha hle. Thawhṭan zan last 16 inkhelah Nadal hi Jannik Sinner lakah a dinhmun phet deuh dawnin lang hman mah se a buai phah chuang lo.

Set hmasa berah Italian player zawkin 5-3 in hma a hruai hman, mahse game hnuhnung pali la zawnin Nadal zawkin set a la. Set hnuhnung pahnihah chuan world number 3 hi nuamsa takin a tlang - chak turin darkar hnih leh minute 17 chauh a hmang.

Player pahnih hi vawi thum an intawnna a ni a, clay court-ah vek niin Nadal a chak vek bawk. Kum 19 mi Sinner pawh hi clay court-a inkhel thiam zinga mi a ni, amaherawhchu a tawnhriat neih tlem leh rilru paukhauh tawk lohna a tuar ṭhin - Nadal aṭangin zir tur a ngah.

Grand Slam vawi 20 champion tawh Nadal chuan, "Sinner hi player ṭha tak a ni, hmabak pawh a nei eng hlein ka hria. Set khatnaah khan game hmasa pahnih la mah ila min lehthal thei a, hlauthawng loin khel se la chuan ka tan a harsa khawp ang," a ti.

Nadal hian a match lehpekah chuan Diego Schwartzman a hmachhawn leh ang. Argentine player hian Jan-Lennard Struff lakah 7-6 (11-9), 6-4, 7-5 in hnehna a chang a, inelna neih laia khel ṭha tluang ber zinga mi a nih avangin Nadal tan fimkhur a ngai dawn.

Vanneihna i tan
Paris khawpuia tennis stadium hmingthang Philippe-Chatrier-ah Djokovic leh rawlthar Lorenzo Musetti an inkhel a, world number 1 hian harsa lo takin a paltlang mai tura ngaih a ni; rin ang ngawt erawh a ni bik lo.

Kum 19 mi Musetti hi world number 76-na daih ni mah se Djokovic lakah a indah hnuai hnung duh bik lo, set hmasa pahnih a la! Set la tur hian service a nei ṭha tawk a, a ball vuak a nain a tlan tam hle bawk.

Amaherawhchu, set thumna aṭangin Novak tak tak kan hmu. Inkhel boruak 'hot' tak kha a ti dul lui tlat a, point hmuh belh turin a hmanhmawh tut tut lem lo bawk, 6-7 (7-9), 6-7 (2-7), 6-1, 6-0, 4-0 a nih laiin Italian player hi hliam vangin a khel chhunzawm thei ta lo.

Seeded pakhatna Djokovic chuan, "Player naupang zawkte nena set nga khelh hi nuam ka ti. Hetiang inkhel hi kei chuan ka hmachhawn fo tawh, major tournament-ah chuan set hnih kan hloh hnuah pawh beiseina kan la nei thei tih a takin a lang," a ti.

Chak lo mah se Musetti hian hriatreng a hlawh tawh dawn, round hmasa lamah David Goffin a hneh tawh, season hmasa lam khan player ṭha Stan Wawrinka, Kei Nishikori, Diego Schwartzman leh Grigor Dimitrov te pawh a lo hneh tawh; a hming hi lo chhinchhiah rawh u.