Euro 2020 - Squad, Stadium, Fans, Ticket etc

Squad chungchang
• June 1 thleng khan player 26 awmna squad a thehluh theih a, ram 24 ten an thehlut vek tawh.
• Squad hi thehluh tawh ni mah se inhliam vang te, Covid-19 positive leh primary contact vang te, damlo vang te leh chhan dang vangtein match hmasa ber an khelh hmain a la thlak theih.
• Goalkeeper bik hi inelna neih lai pawhin a taksaah hliam a neih chuan a thlak theih a, keeper pakhat emaw pahnih emaw pawh la dam ṭha se thlak hi a phal a ni dawn.
• Player thlak tawh erawh belh theih a ni tawh lo.

Khawpui khelhna tur?
Euro 2020 hi khawpui 11-ah khelh a ni dawn. Amsterdam, Baku, Bucharest, Budapest, Copenhagen, Glasgow, Munich, London, Rome, Seville leh Saint-Petersburg ah te khelh a ni ang. Opening match hi June 11, Zirtawpni zan dar 12:30 hian Italy leh Turkey ten Stadio Olimpico, Rome-ah an khel dawn. Semifinal leh final hi Wembley Stadium, London-ah khelh a ni ang.

Inelna thlengtu tih tam chhan hi Covid-19 vang a ni lo a, hrilen hmaa thutlukna siam tawh a ni a, kum 2012 daih tawh khan khatih laia UEFA president Michel Platini chuan, "Eurpean championship kum 60 tlin lawm nan Euro 2020 hi ram hrang hrangah khelh a ni ang," tiin a lo sawi tawh a ni. Euro 2020 hi June 12 aṭanga July 12, 2020 chhunga khelh tur a ni a, Covid-19 vangin a hun sawn ni mah se a hming 'Euro 2020' erawh put tlang tir a ni. Inelna hi June 11-ah ṭan a ni ang a, July 11, 2021-ah a zo ang.

Ticket man hi?
Euro 2020 inkhel en man hi stadium a zir te leh a stage san dan a zirin a danglam zel. Ticket man kimchang chu a hnuaia tarlan ang hi a ni. Group stage-a ticket man tlawm ber hi Rs 2,700 bawr vel a ni a, a man to ber hi Rs 17,000 vel a ni thung.

Knockout stage aṭangin en man a pung a, final-a en man to ber phei chu Rs 84,000 man vel a ni daih. Chutihrualin UEFA-in football fan-te pualin ticket tlawm bik a siam a, ticket man tlawm pawh hi Rs 7,600 approx (semifinal) leh Rs 8,500 (final) a la ni tho.

Entu an awm dawn em?
Euro match zawng zawngah entu an awm thei dawn. Chutihrualin Covid-19 vangin entu awm thei zat hi a inang lo. Wembley Stadium-a inkhel entu zat hi stage sang chinah tih pun tum a ni a, chutiang bawkin stadium dang pawh hi an ram chhunga Covid-19 boruak vangin a la danglam thei bawk.

Record nei ṭha ber Germany
European Championship hi vawi 15 khelh a ni tawh a, Germany-in vawi ruk final lut tawhin kum 1972, 1980 leh 1996 te khan an champion a, ṭum thum an vanduai thung. Spain pawhin record an nei ṭha a, vawi thum tho champion tawhin kum 1964, 2008 leh 2012 te khan nomawi an chawi a, final-ah vawi khat an vanduai.

Final lut tawh ram 12 an awm a, chung zinga ram 10 - Germany, Spain, France, Soviet Union, Italy, Czech Republic, Portugal, Netherlands, Denmark leh Greece te an champion tawh a; final lut tawh zingah Yugoslavia leh Belgium ten nomawi an la chawi lo.

A en theihna tur?
Euro 2020 hi Sony Ten 2, Son Ten 3, Sony Ten 4 leh Sony Six-ah te a en theih dawn. Phone leh computer aṭanga en duh tan 'SonyLIV' App hmangin a en theih a, subcribe man a awm thung. SonyLIV Premium Plan subsribe man hi thla khat atan Rs 299, thla li atan Rs 699 leh kum khat atan Rs 999 a ni. Jio hmang tan erawh Jio TV kaltlangin a thlawnin Sony channel hrang hrangte hi a en theih bawk.