Germany-in goal sarih an khung

Euro 2020 atana inpuah-chahna inkhelah Germany-in Thawhṭanni zan khan Latvia 7-1 in an sawp. Die Mannschaft tan hian Robin Gosens, Ilkay Gundogan, Thomas Muller, Serge Gnabry, Timo Werner leh Leroy Sane ten goal khat ṭheuh an khung a, Kai Havertz tih ṭhat vangin Latvia keeper Roberts Ozols-a'n a an lamah a ti lut bawk.

Germany hian June 15, Thawhlehni zan hian Allianz Arena-ah France an hmachhawn dawn a, Joachim Low hote hi group F-ah Les Bleus, Portugal leh Hungary te nen an awm ho.

Goal sarih...
Joachim Low hoten November 19, 2019 khan Northern Ireland 6-1 in an sawp a, tun ṭum hi hemi hnua goal nga aia tam an khung lehna hmasa ber a ni.

Merkur Spiel-Arena, Dussel-dorf-a inkhelah Champions League nomawi chawi hlim Antonio Rudiger leh Kai Havertz bakah Real Madrid midfielder Toni Kroos ten bul an ṭan thei a, ṭan phat aṭangin goal chance an nei mawlh mawlh a ni ber.

Joachim Low-a'n a tisual tih a inhriat hnuah huaisen takin Mats Hummels leh Thomas Muller te a ko let a, tawnhriat nei pahnih team tan an hlu hle. Germany hian inkhelh ṭantirh lamah hian 80% ball possesion an nei a, an vanduai vanga goal an khung har chungin minute 19-naah Gosens hmangin goal an khung - a tlai chhe lo.

Atalanta left back Gosens tan ram tana a goal hmasa ber a ni a, Man City midfielder Gundogan-a'n a khung belh hnuah Muller-a'n a khung ve lehnghal. Bayern forward hian March 23, 2018 khan Spain lakah Düsseldorf-ah hian goal a khung tawh a, ni 1172 hnuah stadium ngaiah bawk ram tan goal a khung.

UCL final-a goal khungtu Havertz a che ṭha a, a thawhrah vangin keeper Roberts Ozols-a'n an lamah a tilut. Bayern forward Serge Gnabry-a'n khung belh lehin first half-ah 5-0 a ni.

Timo Werner leh Leroy Sane te second half ṭantirhah an lut nghal a, Werner hian minute 50-naah khung belhin Sane-a'n minute 76-naah a khung ve bawk. Goal pahnih inkarah hian Aleksejs Saveljevs-a'n minute 75-naah ṭha zetin a khung a, keeper Manuel Neuer dem theih a ni lo a, Niklas Sule leh Toni Kroos te erawh pressure pek ṭhat loh vangin dem theih an ni thung.

Ranking 138-na
Germany hi chak chiang viau mah se an khingpui Latvia hi FIFA ranking-ah 138-na daih an ni a, India (105) hnuaiah an la awm tihna a ni a, inchhuang thei an ni lo.

Chutihrualin Latvia hian friendly match-ah Lithuania 3-1 in an hneh a, World Cup qualifier-ah pawh Montenegro leh Netherlands lakah 2-1 leh 2-0 chauhin an chak lo a, Euro khel tur zinga mi Turkey 3-3 in an chelh bawk.

Neuer-a tan century
Kum 35 mi Manuel Neuer-a'n Germany record siamin goalkeeper zinga match 100 khel thei hmasa ber a ni a, Die Mannschaft tan hian player 16 chiahin match 100 an khel thei a ni. Bayern Munich goalkeeper Neuer hi inkhelh hmain a teammate ten 'guard of honour' an pe.

Germany tana khel tam ber chu Lothar Matthaus a ni a, ram tan match 150 a khel. Euro 2020 khel tur zingah Thomas Muller (102) leh Toni Kroos (102) ten match 100 an khel tling tawh bawk.

June 7, Thawhṭanni
Germany 7 - 1 Latvia

GER : Robin Gosens 19'; Ilkay Gundogan 21'; Thomas Muller 27'; Roberts Ozols 39' (OG); Serge Gnabry 45'; Timo Werner 50; Leroy Sane 76'
LAT : Aleksejs Saveljevs 75'
Germany XI : Neuer; Ginter, Hummels, Rüdiger; Kimmich, Kroos, Gundogan, Gosens; Havertz, Muller, Gnabry