PSG-in Gini leh Donnarumma an hnaih

European champion nih an tumna kawnga la hlawhtling thei lo Paris St-Germain-in an hlawhtlinna tur kawng an dap zel a, thuthar berah chuan Georginio Wijnaldum leh Gianluigi Donnarumma an lalut dawn.

Kum 30 mi Wijnaldum hian Liverpool-a a contract a hman zawh hnuin free transfer-in a duh ang zawng club a pan thei a, Barcelona pan tura ngaih ni mah se PSG an lo lan hnuah French club zawm a thlang.

Donnarumma-a'n AC Milan-a a contract-a hman zawh hnuin a duh ang zawng club pan turin zalenna a nei a, Barcelona hming lam rik ni mah se PSG bawk a pan dawn niin a lang.

Lionel Messi contract thar la ziahpui thei lo Barcelona tan chuan Wijnaldum leh Donnarumma chan hi chanchin lawmawm a ni lo a, tun hmaa world class player-ten pan an châk ṭhin club ang kha an ni ta lo tih a chiang.

Barca aiah PSG
Liverpool-in an player pawi-mawh Georginio Wijnaldum chelh tum mah se hlawh chungchangah an inrem thei lo a, Dutch midfielder hian Anfield-a cham ai chuan chhuah a thlang.

Kum 30 mi hi Reds nen an inrem thei lo tih a chian hnuah Barcelona nen sawizawm nghal an ni a, Catalan club enkawltu hi Netherlands lama a pu hlui Ronald Koeman a nih bawk avangin a zawm ngei rinna a lian hman hle.

Mahse, khawthlang media-ten Barcelona-a medical nei tur anga an sawi hnuin PSG an lo lang a, French club hausa hian Barca-in an pek tur zat aia a leta tam pek an inhuam.

Gini-a'n a kum a tam ve tawh bawk avangin sum awmna lam a thlang a, Paris khawpui a pan dawn ta zawk - he thuziak i chhiar meuh chuan PSG player a ni tawh hial mai thei.

Poch ngaisangtu
Netherlands tana vawi 75 inlan tawh Wijnaldum hian kum 2016-a Liverpool-a zawm hma khan khatihlaia Tottenham Hotspur coach Mauricio Pochettino chu a lo fak chiam tawh.

Dutch midfielder-in PSG-a pan chhan lian tak chu hlawh piahlamah Poch hi a niin a lang a, season hman zawh taka Liverpool tana Premier League match zawng zawng kheltu hi PSG tan ṭangkaipui tham a ni. Feyenoord aṭanga lar chhuak Wijnaldum hian Liverpool-a hun a hman chhungin Premier League, Champions League, UEFA Super Cup leh FIFA Club World Cup nomawi a chawi hman a, a hlawhtling hle.

PSG-a pan dawn takah chuan nomawi tam takin an zui leh ang tih a chiang a, a pawimawh ber erawh Champions League a ni ang - kum 2024 thleng atan contract hi a ziak dawn niin an sawi.

Donnarumma chu
PSG-in Keylor Navas nei mah se an duh tawk lo a, Donnarumma lakluh ngei an tum. Khawthlang media-te tarlan dan chuan kum 22 mi keeper hi kum nga chhung atan contract an zawrh a, kum khatah pound maktaduai 10.3 hlawhtir an inhuam bawk.

Donnarumma hi amah siam liantu AC Milan nen rei tak chu contract thar chungchangah an indawr a, mahse, hlawh a phut hnem avangin Milan club hian chelh zui zel chiah an ngai lo.

Italy tana vawi 26 inlan tling tawh keeper hian Euro 2020 khel tur Azzurri (Italy sawina) squad-ah a awm mek a, PSG hian Italy camp lamah hian medical an neihpui dawn nia sawi a ni.

Barcelona tan Donnarumma chang tur chuan PSG-in an ngamna aia tama ngam a ngai dawn tihna a ni a, free transfer-a lakluh theih a nih avangin hlawh tam dawn mah se lakluh manhla tur a ni - kum 22 mi lek ni chungin AC Milan tan match 251 a khel hman.