South Korea star hlui Yoo Sang-chul a thi

Asian football legend tih ngam Yoo Sang-chul chu cancer natna avanga rei tak a buai hnuin a thi a, kum 49 mi lek a la ni.

South Korea tana vawi 124 ngawt inlan thei midfielder hi Korea Football Association chuan an ui thu an puang a, "Hlim leh lawm taka hlawhtlinna kan chan ho lai kha kan hre reng ang. Chawl hahdam ang che," tiin an ram legend chu an thlah.

Yoo Sang-chul hian Korea tan goal 18 ngawt a khung a, ram tana goal-a khung zinga pawimawh bera chhal ngam chu kum 2002 khan Poland lakah khungin 2-0 in an chak a, World Cup-a South Korea an chak hmasak ber a ni.

South Korea hian World Cup 2002-ah hian semifinal lutin thawnthu ngaihnawm an ziak a, he zinkawnga player pawimawh Sang-Chul hi World Cup 2002 All-Star team-ah a lang hial.

Sang-Chul hian an ram club Ulsan Hyundai aṭanga bul ṭanin Japanese club Yokohama F. Marinos leh Kashiwa Reysol tan pawh a khel a, K League 1 Best XI-ah vawi thum a lang.