Bucks lakah Nets an hrang

Tlarhnung a phui a, tlarhma lam an hriam thung - Brooklyn Nets chu chak takin an kal fawr mek. Nimin zing NBA Eastern Conference semifinal game 2 inkhelah Nets hian an khingpui Milwaukee Bucks chu 125-86 in an sawp.

NBA champion nih tum Nets hian game 1-ah hnehna an chang tawh bawk, an chak zawn avangin best of seven series-ah 2-0 in hma an hruai mek. June 11, Zirtawpni zing dar 5:00-ah game 3 an khel leh dawn - Bucks tan chak loh a pawi thui tawh hle ang.

Nets hian an match hmasa zawka inhliam James Harden an chhawr thei lo a, a sir aṭangin inkhel a lo en. Harden awm lo mah se basket neih kawngah buaina an nei chuang lo, an thiampuipa Kevin Durant chuan point 32 a nei.

Durant bakah point 22 neitu Kyrie Irving a che ṭha bawk. Nets hian 3-points vawi 21 zet an vawm lut a, playoff chinah match khat chhunga 3-points an neih hnem ber ṭum an tawng.

An chak a ni satliah lo, Nets hi kawng engkimah an chungnung. Quarter lina an khelh lai phei chuan point 49 zeta hmahruai fal lai an nei! Tun season playoff chinah vawi nga zet chu point 10 chuanga chak an nei ta.

Durant chuan, "Player zawng zawng tan sawisel boa khelh theih ngawt a ni lo, a pawimawh lai chu kan tihsual hnuah pawh huaisen taka kan insiamṭha nghal ṭhin kha a ni. Match hnih kan chak avangin kan tlang ta tih erawh a la ni lo, inkhelh hmabak a la tam," a ti.

Nimin zing khan Western Conference semifinal game 1 khelh a ni ve bawk a, regular season hmang ṭha Phoenix Suns chuan Denver Nuggets lakah 122-105 a hnehna changin series-ah 1-0 in hma an hruai.

Nuggets lamain rin loh takin 72-63 in hma an hruai fal thei a, chak thei dinhmunah an ding. Mahse hun tawp lam minute 20 chhungin Suns hian point 59 an neih belh laiin an khingpui hi point 33 bak an neih belhtir lo.

June 10, Ningani zing dar 7:00-ah game 2 khelh zui a ni leh dawn, anni pahnih inkhela chak zawk hian Utah Jazz leh Los Angeles Clippers inkhela chak zawk nen Western Conference final an khel leh ang.