Spain-in training turin Kepa an ko

Covid-19 vangin Euro 2020 khel tur Spain team an buai a, training nei turin Chelsea goalkeeper Kepa Arrizabalaga chu koh a ni.

Barcelona midfielder Sergio Busquets-a'n Covid-19 a kai a, hemi a nih avang hian nizana Spain leh Lithuania ten friendly an khelhah pawh Euro 2020 khel tur ho ni loin Under 21 team an inlan. Spanish FA chuan Ṭhawnṭanni khan player dang te leh coaching staff te an negative thu an puang a, an la inkhung hran tur thu an sawi tel bawk.

Luis Enrique chuan Euro 2020 khel turin player 26 koh theih mah se player 24 chauh a ko a, Covid-19 vanga an buai tak avangin Blues keeper Kepa bakah Leeds United forward Rodrigo Moren, West Ham midfielder Pablo Fornals, Valencia midfielder Carlos Soler, Celta Vigo midfielder Brais Mendez leh Villarreal defender Raul Albiol te chu mamawh huna koh theih turin a hranin training an nei.

Heng player-te hi Spain team training-na hmun Las Rozas-ah an awm lo a, squad zingah an awm lo bawk. Amaherawhchu Covid-19 vanga buaina lian zawk a thleng a nih chuan koh an ni thung ang.

Spain hi group E-ah Sweden, Poland leh Slovakia te nen an awm ho a, June 14, Thawhṭanni zan dar 12:30-ah Sweden nen Estadio de La Cartuja, Seville-ah an inkhel ang.