Quarterfinal-ah Coco Gauff a lut

French Open khelh laiah hmeichhe player langsar an chesual nasa a, tleirawl Coco Gauff leh champion lai Iga Swiakek te erawh hmalam panin an kal zel, player pahnih hian an khingpui ve ve hnehin quarterfinal an lut.

Inkhel dangah season hmasa pahnihna leh seeded palina ni bawk Sofia Kenin a chak lo. Kenin hi Greece nula Maria Sakkari lakah 6-1, 6-3 in a chak lo a, Sloane Stephens pawh Barbora Krejcikova hmaah 6-2, 6-0 in a tlawm bawk.

Kumin French Open aṭang hian - Serena Williams te an tla tawh a, world number 1 Ashleigh Barty leh number 2 Naomi Osaka te an inhnukdawk tawh bawk. Gauff tan nomawi chawi theihna kawng a inhawng, chutih rualin Swiakek chu rinkai ber a ni.

Gauff a tlang
American player dangte ang lo takin Gauff tan clay court hi inkhelh nawmna hmuh a ni. Paris khawpuiah hian 2018 khan junior huangah a lo champion tawh a, tun ṭuma quarterfinal a lut pawh hi a mak hran lo.

Kum 17 mi Gauff hian minute 53 chhung lekin, amah ang bawka French Open junior champion ni tawh Ons Jabeur chu 6-3, 6-1 in a hneh a, tun inelna neih laiah hian set hloh miah loin a la kaltluang thei.

Gauff chuan, "A vawi khat nana Grand Slam quarterfinal ka lut thei hi ka lawm hle, hetiang thleng tura ka khel ṭha thei hi a lawmawm lai chu a ni bawk," tiin a sawi. Zaninah Barbora Krejcikova nen semifinal luh an inchuh leh ang.

French Open 2006-ah khan, khatih laia kum 17 leh ni 44 mi Nicole Vaidisova a inlan, a hnu lamah chuan kum 17 leh ni 86 mi Gauff hi a thiam pariat zinga inlan phak player naupang ber a ni hial.

Swiatek a nghet
Thawhṭan zan inkhelah champion lai Iga Swiatek tan buaina tur a awm lo. Polish nula hian Marta Kostyuk chu 6-3, 6-4 in a hneh a, clay court inelna lianah hian a zawnin match 22 chhung zet chu hnehna a chang ta.

Seeded pariatna Swiatek hian a match lehpekah chuan Maria Sakkari a hmachhawn leh dawn, a nomawi humhim turin match thum chak chauh a mamawh tawh. Justine Henin (2007) hnu lamah hmeichhe player zingah a zawna Roland Garros title la thei an la awm lo.

Kum 20 mi Swiatek chuan, "Zan reiah a hmuna inkhel entu awm loin kan khel a ni a, a nihna takah chuan mahni lama lo insiamrem ngai a tam hle. Light kha a êng lutuk a, a tir lamah kha chuan ball hmuh a harsa ka ti hial," tiin zan inkhelh chu a awlsam loh thu a sawi.

French Open hi a vawi khat nan zan reiah an khel, ram pumah hrileng vangin zan lamah curfew neih a la ni a, hei vang hian chhun lamah entu awm thei mah se zanah erawh entu awm loa an khelh a ngaih phah.