Hamilton ngamtu Celtic an tlan fal

Scottish Premiership-ah Celtic chuan 4-1 in Hamilton Academical an sawp a, table chung berah an awm chhunzawm zel - anmahni hnaih bertu Rangers aia an sanna hi point sarih lai a ni tawh. 

Pathianni zan inkhelah mualneitu Hamilton hian rin loh takin minute 26-naah Marios Ogkmpoe  hmangin goal hmahruai an khung a, mahse minute 34-naa Jamie Hamilton-a red card-in engkim a thlak danglam. 

Celtic tan Odsonne Edouard chuan Jamie-a red card hmuhna aṭanga an free kick hlawhchhuah chu goal-ah a chantir a, hun tawp lamah Christopher Jullien, Edouard leh James Forrest ten khung ve lehin chiang takin Celtic an chak. 

Steven Gerrard enkawl Rangers chuan Inrinni zan khan Aberdeen chu goal awm loin an inhnehtawkpui a, kar hmasa khan Hearts lakah 2-1 in an tlawm bawk - match khata khel tlem chungin Celtic hi point sarihin an thlau ta.