NBA player hlu ber Jokic

Season sarih liam ta khan NBA draft pick second round-ah 41-na a ni a, tunah chuan basketball inelna sang berah hian Most Valuable Player a ni ta - a hming chu Nikola Jokic a ni.

Nimin khan NBA chuan 2020-21 season atana MVP chu Denver Nuggets center Nikola Jokic a nih thu an puang a, atan chawimawina sang hi a hmasa ber a nih bakah Serbian mi zinga dawng thei hmasa ber a ni, a club Nuggets tan pawh a hmasa ber a ni bawk.

Jokic (971 points) hnungah hian Philadelphia 76ers center Joel Embiid (586 points), Golden State Warriors guard Stephen Curry (453 points), Milwaukee Bucks forward Antetokounmpo (348 points) leh Phoenix Suns guard Chris Paul (139 points) te an awm.

6ft 11in zeta sang Jokic chuan, "Ka suangtuah phak loh thil a ni. A tirah chuan kan in bul velah ka inkhel ve, chumi hnuah Euroleague ka khel pawh kha a ropui tawh. NBA mai ni loin MVP thleng a ni ta mai hi chu a mak," tiin a sawi.

NBA draft pick aṭanga chhut chuan Jokic hi MVP ni thei hniam ber a ni a, chutih rualin tun hmain NBA draf zinga lang phak lo Moses Malone chuan player hlu ber chawimawina hi vawi thum ngawt a lo dawng tawh.

Nuggets coach Michael Malone chuan, "Hei chu beiseina sang taka kan thlir ni mah se kan rin phak bak a ni," tiin a player chawimawina dawn chungchang a sawi.

Kum 26 mi Jokic hian Nuggets tan regular season-ah khan match 72 zetah inkhel bul a ṭan a, chawhrualin match khatah 26.4 point, 10.8 rebound leh 8.3 assist nei ziah ang a ni phak.

NBA huang hi American player ten an awp hneh ṭhin hle, chutih rualin tun hnai season hnuhnung pahnihah Giannis Antetokounmpo chu MVP a ni. Greek tlangval bakah Dirk Nowitzki leh Jokic te hi European player zinga hetiang chawimawina dawng thei an ni.