Zverev hmachhawn tur Tsitsipas

Tennis player chhuak thar ṭha bik zinga mi Alexander Zverev leh Stefanos Tsitsipas te chu French Open semifinal-ah an inhmachhawn dawn, player pakhat zawk chuan a vawi khat nan final a lut dawn chiang.

Player pahnih hian Thawhlehni zan khan an khingpui ve ve hnehin quarterfinal an paltlang, beisei aia khel ṭha Daniil Medvedev chu Tsitsipas hneh lo hian a zinkawng a tawp ta thung - Greek tlangval hi clay court a inkhel thiam zinga mi a ni.

Tsitsipas a ṭha
Philippe-Chatrier-a inkhelah kum 22 mi Tsitsipas hian darkar hnih leh minute 19 chhhungin Medvedev chu 6-3, 7-6 (7-3), 7-5 in a hneh a, tun season French Open bikah match nga a khelh aṭangin set khat chauh a la hloh chhunzawm zel.

Seeded pangana Tsitsipas chuan, "Ka tlang avangin ka lawm, set thumna game hnuhnung berah 40-0 in ka hnufual hman a nih kha, mahse khatih lai pawh khan ka beidawng duh lo," tiin a sawi a, tihsual a nei tlem chu a chak chhan nia a hriat thu a sawi tel bawk.

Chak lo mah se Medvedev tan kumin French Open hi hriatreng tawh tur a ni. Russian star hian Roland-Garros a khelh hmasak paliah chak ni hmel a hmu miah lo, kuminah rinkai ni lo chungin inlan mah se beisei aiin a thleng sang.

Kum 25 mi Medvedev khan set thumnaah a dinhmun siamṭha hman mah se a tawpah a zuih. A khingpuiin match point a hmuh hnuah ball vawr kang loin a service a, a beidawng nge inkhel a ngai thutak tawk lo tih zawhna a tam hle.

Seeded pahnihna Medvedev chuan, "Inkhelh chhung zawng khan ball vawr kang loa service theihna remchang ka ngaihtuah, a tawpah chauh remchang ka hmu. Tsitsipas khan court a tuam hneh hle, ka tan chuan duhthlan tur dang kha a awm lo a ni," tiin a sawi.

Zverev a ṭha tawk
Tunah a nih loh chuang engtik hunah nge ni chuang ang? Kum 24 mi Zverev tan tun ṭuma aia Grand Slam nomawi chawi theihna remchang hi a awm kher lo mai thei, mellung pawimawh phun turin match hnih chak chauh a hmabak ta.

German tlangval hian Alejandro Davidovich Fokina chu darkar khat leh minute 36 chhung lekin 6-4, 6-1, 6-1 in a hneh a, kawng engkima chungnung chungin hnehna a chang - harsatna a tawk lo tia sawi theih a ni.

Seeded parukna Zverev chuan, "Zep thu a awm lo, a nihna takah chuan Grand Slam champion aia chakawm a awm thei lo. Ka lakah beiseina a sang ṭhin a, keimah leh keimah ngei pawh boruak ka insiamchawp ṭhin a ni ber.

"Thil awmdan ka zir thiam ve zel a, tunah chuan dawhthei taka nghah a ngaih chang pawhin ka rilru a hmanhmawh tut tut tawh bik lo," tiin a sawi a, a tawnhriat neih chu a hlawkpui thu a sawi bawk.

6ft 6in zeta sang Zverev hian inelna hrang hrangah nomawi 15 zet a chawi tawh, a thiam zual pariat inelna ATP Finals-ah pawh a champion hial tawh. Mahse, major tournament-ah a zuih leh ṭhin, kumina a khelh chhoh dan thlir chuan final thlen a beisei sang khawp ang.