Wolves manager thar Bruno Lage

Premier League club Wolves chuan an manager thar atan Bruno Lage an lakluh thu an puang, season tawp ruala chhuak ta Nuno Espirito Santo hmun ruak luah turin an lalut.

Kum 47 mi Nuno-a'n season li a chamchilh hnuah Molineux Stadium a chhuahsan a, a hmun ruak luah tur hian amah ang bawka Portuguese manager an thlang hi a mak hran lo.

Tun hmain Lage hian English football-ah tawnhriat a lo nei tawh. Sheffield Wednesday leh Swansea-ah khan assistant coach a lo ni tawh, chumi hnuah Benfica zawmin 2019 khan Portuguese title a lakpui hial.

Nomawi an chawi bakah manager ṭha ber atan thlan a ni a, a lakah pawh beiseina a sang zual hle. Mahse, 2020 khan an league title an humhim thei lo a, an elpui Porto lakah an hloh - a club hi chhuahsan zuiin free transfer hmangin Wolves hi a zawm thei.

Portuguese manager Lage chuan, "England ramah hna thawk tura kir leh theihna remchang ka nei a, chutah pawh team lian tak enkawl turin a ni leh nghal, hetiang baka thu lawmawm hi a awm thei tawh chuang lo ang.

"Nuno Espirito Santo hna thawh ṭhatsa kan chhunzawm dawn a, player mai bakah club chhunga mi zawng zawng ten inpawh tlang taka hna kan thawh theih nan theihtawp ka chhuah ang," tiin a sawi.

Season liam ta khan Wolves hian Premier League-ah point 45 an hmu a, table-ah 13-na ni chungin season an khar.