Iceland lakah Poland an him hram

Robert Lewandowski hoin Poland-in Iceland hmachhawn mah se Euro 2020 khelh hmaa an match hnuhnung berah Iceland chu 2-2 in an inhnehtawkpui hram a, lawmna tur a ni lo.

Iceland tan hian Albert Gudmundsson chuan minute 24-na lekah goal hmahruai a khung a, AZ Alkmaar winger goal khung hi Napoli midfielder Piotr Zielinski hmangin Poland-in minute 34-naah an chhanglet.

Goal dang lut loin chawlhlawk hman a ni a, mahse, second half-ah pawh first half ang thoa bul ṭan ṭha zawk chu Iceland an ni - minute hnihna lekah Brynjar Bjarnason-a volley hmangin Iceland-in hma an hruai nawn.

Iceland hian Bjarnason-a goal hi an chakpui mai dawn niin a lang hman tawh a, mahse, hun tawp nan minute hnih chauh a awm tawh tihah Karol Swiderski chuan Poland si phurh a sut hram - Greek club PAOK striker hian minute 81-naah Lewandowski a thlak a, Poland a chhanhim.

Poland hi group E-ah Slovakia, Spain leh Sweden-te nen an awm ho a, June 14 zanah an match hmasa ber chu Slovakia nen an khel dawn a ni - an group awmna nena tehin inelna hmaa an match hnuhnung bera Euro khel phak lo Iceland hnehtawk hram hi result ṭha a ni lo.