Pavlyuchenkova leh Zidansek-i an tlang

French Open hmeichhe singles semifinal-ah Anastasia Pavlyuchenkova leh Tamara Zidansek an inhmachhawn dawn, player pahnih hian tun hmain Grand Slam huangah quarterfinal an la patlang ngai lo.

Thawhlehni zan inkhelah Pavlyuchenkova hian doubles huanga a ṭanpui Elena Rybakina a hmachhawn a, set hloh hmasa mah se world number 22 lakah hian 6-7 (2-7), 6-2, 9-7 in hnehna a chang let.

Inkhel dangah Slovenian nula Zidansek chuan Spanish player Paula Badosa chu harsa takin 7-5, 4-6, 8-6 in a lo hneh ve bawk. Nizan khan quarterfinal-ah champion lai Iga Swiatek a inlan a, result kan hre hman lo.

Court Philippe Chatrier-a inkhelah Rybakina a che fuh hmasa. Serena Williams hnehtu hian tie break-ah 5-0 ngawta kal fal hmanin set a la. Set hnihnaah erawh Pavlyuchenkova-a'n a khingpui service vawi hnih a chhuhsak thung.

Kum 29 mi Pavlyuchenkova a hnung tawlh duh tawh lo a, major tournament-ah quarterfinal vawi ruk a khelhna niin a vawi khat nan a paltlang hram, dai ngai loh ram a in vaw kai.

Inkhel danga hnehna changtu Zidansek tan pawh thawnthu thar zel a la ni. Tun hmain Grand Slam bikah second round aia sang a la thleng ngai lo; Paris khawpuiah bik phei chuan first round a paltlangna hmasa ber a ni hial.