Argentina leh Colombia inhnehtawk

Nimin zing khan South America ram ten World Cup qualifying an khel a, inkhel ngaihven hlawh takah Argentina chu an mikhualna ramah Colombia nen 2-2 in an inhnehtawk.

Hmahruaitu Brazil chuan Neymar-a goal leh a siamsak hmangin Paraguay 2-0 in an hneh a, Tite naute hian match ruk an khelh tawh chinah hnehna la chang vekin table hmahruaitu an ni. An hnungah hian Lionel Messi awmna Argentina an awm.

Estadio Metropolitano-a inkhelah mikhual Argentina lamin minute riat chhungin goal hnih an nei hman. Cristian Romero (3') leh Leandro Paderes (8') te hmangin hma an hruai a, an dinhmun pawh a ṭha hman hle.

Second half minute 51-naah Luis Fernandi Muriel Fruto-a penalty hmangin si phurh an sut ṭhen a, hun tawp hamrik rik hma chiahin Miguel Borja chuan siphurh a sut zo a, anmahni mualah point hlu tak an sual chhuak.

South America ramte hian Thawhṭanni zing lam aṭangin Copa America an khel chhunzawm leh nghal dawn. Inelnaah hian ram 10 an inlan dawn, a thlengtu tura tih Argentina leh Colombia te an inhnuhdawh avangin Brazil ramah an khel ang.