Premier League khelh turah Mings-a lawm lo

Aston Villa defender rinrawl Tyrone Mings chuan Premier League khelh chhunzawm tur chungchangah na takin thuneitute a dem a, English top flight league khelh chhunzawm tur a nih chhan chu 'sum' vang chauh a nih thu a sawi. 

Premier League hian coronavirus vanga inkhel a tihtawp reng hnuin June 17-ah league khelh chhunzawm leh turin thutlukna a siam a, club-te chuan league khelh chhunzawm tur atan hian training an ṭan leh tawh. 

Mings chuan, "Premier League khelh zawh duhna tak tak thinlung ai mahin sum buaina avanga khelh zawh duh an ni zawk tih hi 100%-in a chiang a ni. Project Restart hi sum vang a ni a, mi zawng zawngin chu chu an pawm ang. 

"Ni e, duhthlan tur dang kan neih miau loh avangin inkhelh leh hi ka thlawp. Mahse, league khelh chhunzawm chungchangah hian player-te chu a hnuhnung bera rawn kan ni a, hei hi football-a kan pawimawhna 'level' chu a ni," a ti a, a lungawi lo hle.

Mings chuan player-te chu sumdawnna bungraw chi khat ang lek an nih thu a sawi bawk a, FA, EFL, UEFA, Premier League leh sorkar berin thutlukna an siam tawh chuan duhthlan tur dang an neih loh thu a sawi a, "Inkhel duh lo ila, 'Chhuak rawh,' tia hnawhchhuah chiah kan hmabak dawn a ni," a ti. 

Premier League hian season khelh chhunzawm leh a nih hmain test vawi engemaw zat club player leh staff-teah a lo nei tawh a, Ningani leh Zirtawpni khan mi 1,130-in test hnuhnung ber neiin positive an awm lo. 

English top flight league hian Ningani leh Zirtawpnia test zat chhiar telin a pumpuiin mi 3,882-ah test an nei tawh a, an zinga 12 chauh an positive a ni.