July 31-ah NBA khelh chhunzawm an beisei

NBA commissioner Adam Silver chuan season hman chhunzawm ngei an tum thu a sawi a, basketball inelna sang ber hi July 31 aṭanga khelh leh theih an beisei thu a sawi chhuak.

Covid-19 vangin March 11 aṭang khan NBA hi chawlh lailawk a ni, North America-ah chuan infiamna lian zingah hri leng vanga an chawlh lailawk hmasak ber a ni hial - regular season zo hman loin an chawl rih.

NBA team neitu zinga mi, a hming tarlan loh chuan, "Adam Silver chuan khelh zawm a duh a, club thuneitu lam chu July thla tawp aṭanga inkhel tur angin min hrilh," tiin NBA commissioner thusawi a sawi chhawng.

Basketball inelna hi an khelh zawm a nih pawhin tun hma ang khan a hmuna en luih luih theih a nih a rinawm loh, court hrang hrangah an khel kual ngei dawn em tih pawh hriat a la ni rih lo.

Regular season bakah playoff khelh hmabak an la nei, conference champion zawn hnuah NBA Finals khelh a la ngaih avangin match khelh hmabak hi a la tam a, coronavirus kai tam ber ram an nih bawk avangin fimkhur taka an kal a ngai ang.