Spain an buai - squad thlak a ngai mai thei?
Euro 2020 khel tur Spain-in inelna neih ṭan a nih hmain buaina an tawk a, captain Sergio Busquets-a'n Covid-19 a kai tih hmuhchhuah a nih avangin Nilaini zana Lithuania nena friendly match an khelh tur pawh Spain Under-21 in an khel a, Hugo Guillamon, Brahim Diaz, Juan Miranda leh Javi Puado-te goal hmangin 4-0 in an chak.
Lithuania nena an inkhelh zawhah Spain-in chanchin lawmawm lo an nei zui a, centre back Diego Llorente chuan Covid-19 a kai ve leh thu an puang - Spain hian June 14 zanah Sweden nen an match hmasa ber an khel dawn a, Covid-19 kai player-te chu ni 10 tal khung hran tur an nih avangin Busquets leh Llorente chuan Sweden hi an hmachhawn thei dawn lo chiang.
La Roja (Spain sawina) player-te hi an vaiin khung hran vek an ni a, inlan theih loh palh hlauhthawn thuah player 17 ngawt chu Spain hian a hranin training an neihtir mek - June 11 zanah Euro 2020 khelh ṭan a ni dawn a, Spain hian an squad hi an thlak danglam duh a nih chuan inelna ṭan hma hian thutlukna an siam a ṭul ang.
Busquets leh Llorente ten Covid-19 an kai avang hian Spain player-ten a huhoin training pawh an nei thei lo a, a mimal angin training an nei vek - Spain ṭantu tan chuan thu hriat nuam a ni lo ang tih a chiang.
La Liga expert Semra Hunter chuan, "Busquets-a'n Covid-19 a kai tih a chian khan Spanish FA chuan hri a darh an rin loh thu an sawi a, mahse, tunah Llorente-a'n a kai tih a chian ve leh takah chuan an hlauthawng ru hle a ni," a ti a, Spain squad thlak hlawkna chance-a awm thu a sawi.
Semra Hunter chuan sawi zawmin, "Mi pathum emaw a aia tam pawh an positive leh chuan Spain squad-ah hian Covid-19 a darh anga sawi theih a ni tawh ang," a ti a, hetihlai hian an match hmasa bera an hmachhawn tur Sweden pawh an buai ve tho.
Sweden hian an player pahnih, Juventus winger Dejan Kulusevski leh Bologna midfielder Mattias Svanberg-te an positive thu an puang.
Hetihlai hian Spain sports minister Jose Manuel Rodriguez Uribes chuan Spain player-te chu nimin khan hri danna an pek tur thu a sawi a, he thuziak i chhiar meuh chuan player-te hian hri danna hi an la fel tawh tura ngaih a ni.
Euro 2020-ah Spain hi group E-ah an awm a, June 14 zanah Sweden hmachhawnin Poland (June 19) leh Slovakia (June 23) te nen an inkhel leh ang.
Spain Squad
Goalkeepers (3) : David de Gea (Manchester United), Unai Simón (Athletic), Robert Sánchez (Brighton & Hove Albion)
Defenders (7) : José Gayà (Valencia), Jordi Alba (Barcelona), Pau Torres (Villarreal), Aymeric Laporte (Manchester City), Eric García (Manchester City), Diego Llorente (Leeds United), César Azpilicueta (Chelsea)
Midfielders (10) : Thiago Alcántara (Liverpool), Sergio Busquets (Barcelona), Koke (Atlético), Marcos Llorente (Atlético), Dani Olmo (Leipzig), Rodri (Manchester City), Fabián Ruiz (Napoli), Pablo Sarabia (Paris), Ferran Torres (Manchester City), Adama Traoré (Wolves)
Forwards (4): Álvaro Morata (Juventus), Gerard Moreno (Villarreal), Mikel Oyarzabal (Real Sociedad), Pedri (Barcelona)
Covid-19 Positive
Sergio Busquets (Barcelona) leh Diego Llorente (Leeds United)
Bio Bubble
Covid-19 laia Bio Bubble an tih awmzia chu player-te hri leng laka an him theih nan mi nawlpui lakah an inkhung hrang. Hotel thlenna bik an nei a, training-na leh match atan lirthei kalna bik an nei a; an chhung leh ṭhiante nen an inhmu thiang lo.
Spain team-ah mi pahnih positive an awm tak avangin player 17 chu koh mai theih turin an awm a, a hran hlakin training an nei. A tawi zawng chuan Bio Bubble-ah an awm tihna a ni.
Player 17-te chu
Busquets positive vanga player koh paruk : Kepa Arrizabalaga (Chelsea), Rodrigo Moreno (Leeds United), Pablo Fornals (West Ham), Carlos Soler (Valencia), Brais Mendez (Celta Vigo) leh Raul Albiol (Villarreal)
Llorente positive vanga koh belh 11 : Alvaro Fernandez (Huesca), Oscar Mingueza (Barcelona B), Marc Cucurella (Getafe), Bryan Gil (Eibar), Juan Miranda (Betis), Gonzalo Villar (Roma), Alejandro Pozo (Huddersfield Town), Brahim Diaz (Milan), Martin Zubimendi (Real Sociedad), Yeremy Pino (Villarreal) leh Javi Puado (Espanyol)