Lazio-in Maurizio Sarri an la lut

Nimin khan Lazio chuan manager atan Maurizio Sarri an lakluh thu an puang. Juventus leh Chelsea manager hlui hian June 2023 thleng contract a ziak.

Season hman zawh taka Lazio manager Simone Inzaghi chuan Antonio Conte hmunruak hnawh khat turin Inter Milan a pan. Kum 45 mi Inzaghi hnuaiah Lazio hian Coppa Italia vawi khat an champion bakah Supercoppa Italiana nomawi vawi hnih an chawi bawk.

Serie A-ah Lazio hi parukna an ni a, season tharah kum 62 mi Maurizio Sarri hoin Europa League an khel ang. Sarri hi football zinkawng hi a ngaihnawm a, banker aṭangin football club lian ber ber thlengin a enkawl thei a ni.

Khawvelin Sarri a hriat ṭan chu Napoli a enkawl ṭan a ni a, hemi hma hian Empoli chu Serie B-ah pahnihna a nihpui avangin Italy-ah chuan a lar viau tawh.

Napoli-ah Sarri hian kum thum chhungin nomawi chawi lo mah se a naute khelh dan hmuhnawm tak avangin Chelsea-in July 14, 2018 khan an lalut. Italian manager hian London club hi Europa League-ah a champion pui a, League Cup-ah pahnihna a nihpui bawk.

Season khat lek Premier League club enkawlin Sarri hian Juventus a kaihruai a, Serie A nomawi chawipui mah se Coppa Italia leh Supercoppa Italiana-ah final-ah a vanduai ve ve. Sarri hian season khat chauh Juve hi a enkawl a, a hmunruak hi Andrea Pirlo-a'n rawn luahin Serie A nomawi an chawi lo.

Serie A-ah manager an thlak danglam nasat avangin season thar boruak a nung khawp ang. Juventus-in manager hlui Massimiliano Allegri an lalut a, Inter Milan-in Simone Inzaghi an la a, Napoli-in Luciano Spalletti an la a, Fiorentina-in Gennaro Gattuso an lalut bawk.