Benzema a inhliam; Giroud-a'n goal hnih a khung!

Euro 2020 champion beisei zinga mi France chuan inelna ṭan hmaa an match hnuhnung berah Bulgaria chu 3-0 in sawp mah se chanchin lawmawm lo an nei tel a, Karim Benzema chu hliam vanga lak chhuah a ni.

Kum ruk dawn France squad-a a tel tawh loh hnuah Benzema hi Didier Deschamps-a'n a ko kir a, Real Madrid striker hmalam hun tur a chiang lo. Benzema hi Euro inbuatsaih nana France match hnihah a inlan ve ve a, goal-a la khung lo; 3-0 a Wales an hneh ṭumin penalty a pet goal lo.

France tan Antoine Griezmann chuan bicycle kick mawi zet hmangin goal hma-hruai a khung a, Olivier Giroud-a'n France player ropui zingah tel a phu tih pholangin goal hnih a khung ve bawk.

Dream 'three'
France boss Deschamps-a'n 4-1-2-1-2 formation hmangin tlarhmaah football khawvel hmuh chak player pathum a inkawp tir a, Mbappe leh Benzema-ten a hma an tawn a, an hnung chiahah Griezmann a awm.

Inkhel ṭantir aṭangin player pathumin goal khung châkin Bulgaria an rûn a, goal hlauhawm an insiam nual a,a tir minute 20 chhungin ‚goal teuh‘ vawi thum zet an nei.

A mawi a ni, Griezmann!
France-in goal nawr hna an thawk a, Bulgaria lamin a ven hna an thawk chhunzawm zel.

Minute 29-na a ni a, Les Bleus-in goal an thun ta - Pogba, Benzema, Corentin Tolisso leh Griezmann-ten mawi taka ball an inpek kual hnua Mbappe shot naran tak chu Bulgaria tlarhnungin an dang per a, a per lehlam hi Griezmann chuan boruaka invawrh kang chungin mawi zetin a 'bin' a, Bulgaria midfielder Ivaylo Chochev chuan lo tauh thawiin a goal.

Halaf time dawn hnaiah France tan chanchin lawmawm lo a thleng - Benzema chu hliam vanga thlak a ngai.

Kum 33 mi striker hi minute 41-naah lakchhuah a ni a; France tan a khelh phak loh laia mawi lo taka a chanchin a sawi ṭhin Giroud chuan Benzema hi a thlak.

Chhandamtu Giroud
France-in goal hlauhawm nei mah se goal-a khung thei lo - minute 79-naah Bulgaria zawkin chance an nei a, Dimitar Iliev chuan chance ṭha a hlah tlat -France an vannei.

Minute 83-naah Giroud-a inlar - Bayern Munich right back Benjamin Pavard-a ball pek ṭha zet chu Giroud hian goal bul aṭangin a lo pet lut zauh a, striker goal dik tak a ni.

A la tawp mai lo - minute 90-naah Giroud hian a khung belh - kum 34 mi striker hian ram tan match 108-a khelha goal 46 a khungna chiah a ni a, ram tana goal khung hnem lamah Thierry Henry (51 goals) chu goal nga chiahin a phak ta lo!

Benzema inhliam chu
France tan match 83-a khelha goal 27 khungtu Benzema chanchin sawiin Deschamps chuan, "A hliam avangin khelh harsa a ti deuh a, thlak a dil avangin kan thlak. Kan medical staff-ten uluk takin an enkawl mek," a ti.

Les Bleus hi group F-ah awmin, June 15 zanah an match hmasa ber chu Germany nen an khel dawn a, Hungary (June 19) leh Portugal (June 23) an hmachhawn leh ang.

Benzema hi an chhawr theih loh chuan a uiawm dawn a; chutih rual chuan France hian Benzema tel loin Euro 2016-ah khan final an lut a, World Cup 2018-ah an champion bawk - mangan viauna tur a ni lo.