Zanin aṭangin Euro 2020 ṭan a ni dawn

Covid-19 vanga kum khat dawrha sawn a ngaih hnuah 2020 UEFA European Football Championship chu zanin aṭangin khelh ṭan a ni dawn. Zanin dar 12:30 hian Italy leh Turkey te Rome khawpuia stadium Stadio Olimpico-ah an inkhel ang.

Group A-ah hian Wales leh Switzerland te an awm bawk a, anni hi June 12, Inrinni zan dar 6:30-ah an inkhel thung ang.

Rinkai Italy
Italy hian Euro atana inpuahchahna friendly match pahnihah San Marino leh Czech Republic te 7-0 leh 4-0 in an sawp a, an inkhel a dak ṭha hle. Roberto Mancini hote hi Euro khel tur pawha match 10-a vawi 10 chak an nih avangin dah san ngei a ṭul. Mancini-a'n friendly match hnihah starting eleven a thlak hlawk a, Turkey lakah hian Czech an hneh ṭuma bul ṭantu tam zawk an inlan ang.

Match hnuhnung bera bul ṭantute chu Gianluigi Donnarumma; Alessandro Florenzi, Leonardo Bonucci, Giorgio Chiellini, Leonardo Spinazzola; Nicolo Barella, Jorginho, Manuel Locatelli; Domenico Berardi, Ciro Immobile leh Lorenzo Insigne te an ni. Chutihrualin Berrardi aia Juventus forward Federico Chiesa a lut ta zawk a nih pawhin a mak lo ang.

Friendly match pahniha inlan lo Marco Verratti erawh hliam vangin a la inlan theih a beiseiawm lo a, chutihrualin PSG midfielder tel lo hian Azzuri hi an la ṭha hle. Tlarhmaa Berardi, Immobile leh Insigne te inkawp hi hmuhnawm a tling thei a, Barella thiamzia hi sawi hmaih a thiang lo. Inter Milan tana Christian Eriksen-a'n khelhna hmun a chan tam tawk loh chhan chu Barella hi a ni tlat.

Knockout-ah chuan tlarhnung a pawimawh a, keeper Donnarumma hi hmabak nei êng tak a ni. Kum 22 mi keeper hmaa ding tur hian ram tana match 100 khel tling tawh captain Chiellini leh Bonucci te an awm a, midfield-ah Jorginho a awm bawk avangin kil tinah an ṭha.

Turkey hi...
Turkey vanduaina chu Italy nen bul an ṭan tur hi an ni a, Azzuri aiin nem deuh mah se group stage paltlang thei tur chuan Crescent Stars hi an rinawm hle. World Cup-a pathumna nih puitu Senol Gunes hnuaiah Turkey hi an insiamṭha hle.

Gunes-a hote hian kuminah Netherlands leh Erling Haaland-a telna Norway an hneh a, kumina chak loh an la nei lo ringawt pawh hi inrintawkna neihna tham a tling. Coach tawnrhriat ngah Gunes hi an innghahna tur a nih rualin player ṭha an kawl tel bawk.

Turkey hian league nung tak an neih avangin tun hmain an player ṭha hi ram pawnah a chhuak tam tawk lo a, tun hnaiah erawh Europe club liana khel an awm fur. Tlarhnunga ding tur Caglar Soyuncu leh Merih Demiral te hi Leicester leh Juventus tana khel an ni.

Lille champion nana player pawimawh Burak Yilmaz an kawl a, knockout tournament-ah chuan goal khung thei striker hi a pawimawh ṭhin. Midfield-ah Hakan Calhanoglu (Milan), Cengiz Under (Leicester) leh Yusuf Yazici (Lille) te an awm a, an khelh ṭhat ṭumah chuan Italy tan mangchhia an thlentir thei ang.