Ronaldo-a'n Ali Daei a hnaih

Portugal chuan Nilaini zan khan friendly match-ah Israel 4-0 in an hneh. Estadio Jose Alvalade, Lisbon-a inkhelah hian Cristiano Ronaldo-a'n goal a khung bakah Bruno Fernandes-a'n goal hnih a khung a, Manchester Ctiy wing back Joao Cancelo-a'n goal khat a khung belh bawk.

Fernando Santos-a'n Euro 2020 atana an ṭhat dan ber tur a la zawng chho zel a, Israel laka bul ṭantute hi Spain nen goal awm loa an inhnektawk ṭuma bul ṭantute aiin an ṭha zawk.

Kum 36 mi Ronaldo-a'n inkhelh ṭantirh lamah chance ṭha hlah tam mah se minute 44-naah a pet kawh vangin goal a khung. Juventus forward ball pet hi a kawh avangin Israel keeper Ofir Marciano-a'n a dang thei lo.

Ronaldo hian ram tan goal 104 a khung ta a, ram tana goal khung tam ber Iran chhuanvawr Ali Daei (109) record tluk pha turin goal nga dang a mamawh a, Euro 2020 chhunga a khum hman chuan record hi a hlu lehzual ang.

Manchester United midfielder Bruno Fernandes chuan Ronaldo khung hma hian Cancelo siamsak chu ṭha zetin a pet goal. Man City midfielder Cancelo hian minute 86-naah ama pualin a khung a, Fernandes-a'n injury time-ah a khung belh leh bawk.