Group A - Italy elpha tur tu nge awm?

Euro 2016 khan Italy kha team ṭhaa sawi an ni lo a, amaherawhchu Antonio Conte hoin quaterfinal an thleng a, Germany lakah penalty hmangin an vanduai. Azzuri hi Conte chhuah hnuah Gian Piero Ventura hoin an mualpho a, World Cup 2018 an khel pha lo.

May 14, 2018 aṭangin Roberto Mancini-a'n Italy team hi a enkawl a, an result a ṭhat em avangin champion rinkai zinga mi an ni tawh. Kum 2019 khan match 10 khelin an khingpui zawng zawng an hneh vek a, nikum khan match riat khelin chak loh an nei lo.

Azzuri hian match hnuhnung pariatah hnehna an chang vek a, heng match-ah te hian goal an chhuah loh bakah goal 25 an khung. Mancini hote hi an ṭha tih a chiang.

Turkey hi FIFA ranking aṭanga teh chuan a hniam ber an ni a, mahse 2002 World Cup-a pathumna nihpuitu coach Senol Gunes-a'n a rawn ho leh tawh. Captain Burak Yilmaz hi Ligue 1-a Lille champion puitu a ni a, Europe club liana khel player an kawl nual.

Crescent Stars (Turkey sawina) hian kum 2002 hnuah World Cup an la khel leh lo a, Euro-ah erawh 2008 khan semifinal lut lehin Euro hnuhnung berah khan group stage-ah an tla.

Switzerland leh Wales hi team intluk tawka ngaih an ni a, June 12, Inrinni zan dar 6:30-a an inkhel result hi a pawimawh dawn. Vladimir Petkovic hnuaiah Swizertland hian kum sarih an khel tawh a, Euro 2016 khan last 16 an thleng pha bawk.

Hetihlai hian Wales erawh Euro 2016-a semifinal thlenpuitu Chris Coleman thlaktu Ryan Giggs-a'n mimal thil avangin a ho thei dawn lo. Nikum kum tawp aṭang khan Wales Under 21 enkawltu Robert Page-a'n a ho a, an thiampuipa Gareth Bale-a vanglai a pelh tawh bawk avangin group stage an paltlang theih chuan result ṭha a ni ang.