Group of Death - Group F

FIFA World Cup champion France, Euro champion lai Portugal bakah inelna thlengtu pahnih Germany leh Hungary te group khatah an awm ho a, group F hi hnial rual loin 'group of death' a ni.

Didier Deschamps kaihhruai France hi an player neih dan thlirin champion rinkai ber tia chhal ngam an ni a, player enbik tur pawh an awm lo. Kylian Mbappe, Karim Benzema, NGolo Kante, Paul Pogba leh player ṭha dang an ni fur.

Portugal hi Euro 2016-a an champion kha an vanneih vangah a ngaih theih a, kuminah erawh champion se vanneih vang a ni tawh dawn lo. Ṭum dangah chuan Cristiano Ronaldo a langsar a, kuminah erawh Manchester City champion puitu defender Ruben Dias, Man United chhuanvawr Bruno Fernandes, Liverpool forward Diogo Jota leh La Liga champion Atletico Madrid forward Joao Felix te an ni nawk.

Germany hi an tlakhniam laia ngaih an ni a, Joachim Low hoten inrintawkna an tlachham. Chutihrualin Die Mannschaft hian talent ṭha an kawl hnem tih lanchianna chu Euro Under 21-ah an champion thei a, an match hnuhnung berah Latvia 7-1 in an sawp.

Hungary hi team nem ber an ni a, qualifying round-ah Croatia leh Wales an tluk lo. Nations Legue lama an chet ṭhat vangin an tling hlauh. Mahse maw, Hungary hi Euro 2016 khan group hmahruaitu niin group stage an patlang a, champion zui ta Portugal kha pathumna an ni. Hei chauh hi a ni lo, Hungary leh Germany hian an mualah group match an khel thei dawn.

Euro-ah group khat aṭangin pathum tan last 16 luh theih dan a awm a, group paruka pathumna zinga ti ṭha paliten last 16 an lut dawn. Ram ṭha awm khawmna aṭang chuan pathumna ni chunga last 16 thlen hi a harsa lehzual ang.