Nadal hmabak chu Djokovic
Tunlai infiamna khawvel chu 'statistics' hmangin an teh nasa ta le. French Open huanga Rafael Nadal chet dan erawh chhiarkawp hmanga teh vek chi a ni ve lo. Clay court chhunga a chetla vel hi chu mita hmuh a, a hmuhnawm thu benga in hrilh chhawn leh mai chi zawk a ni.
Roland-Garros champion lai Nadal hian zaninah world number 1 Novak Djokovic a hmachhawn dawn, semifinal ni mah se final aia boruak lian leh hmuhnawm zawk tur a ni dawn - mipui en châk pawh a ni ang.
Zanin dar 6:30 hian Paris khawpuiah French Open semifinal khelh a ni dawn a, match hmasa zawkah Alexander Zverev leh Stefanos Tsitsipas an inkhel dawn, an zawh hunah Nadal leh Djokovic ten an chhunzawm ve leh dawn a ni.
A ṭha pahnih
Nilaini aṭang khan France rama inkhuahkhirhna chu thlahdul a ni a, zan lamah pawh inkhel entu an awm thei tawh. Philippe-Chatrier-ah fans 5000 an pungkhawm nghal a, inkhel hmuhnawm chhawp chhuahsak an ni. Zan lama a hmuna entu awm hian semifinal boruak pawh a ti hot' zual ngei ang.
Vawi 13 champion tawh Nadal-a'n darkar hnih leh minute 45 chhungin Diego Schwartzman chu 6-3, 4-6, 6-4, 6-0 in a hneh, clay court inelna lianah hian a match hnuhnung 35 zetah a chak vek. A nomawi kawl lai humhim turin match hnih chak a la hmabak.
Quarterfinal inkhel dangah Djokovic pawh a buai bik lo, seeded pakhatna hian Matteo Berrettini lakah 6-3, 6-2, 6-7(5), 7-5 in hnehna a chang ve bawk a, season hmasa final-a a ngam loh Nadal hmachhawn turin inbuatsaihna a nei ṭha tawk hle.
Novak a sang hret
Player ropui pahnihte hi tun hmain vawi 57 zet an inhmachhawn tawh, Serbian tlangval Djokovic-a'n match khatin hnehna a chang hnem zawk - zaninah Nadal tan a elpui umphak theihna kawng a inhawng dawn, major title neih hnem lama inel mek an ni bawk.
Djokovic chuan, "Season hmasa final-ah kha chuan kawng engkimah Nadal ka phak lo, kuminah erawh kar thum chhung chu clay court-ah ṭha takin ka khel tawh a, beiseina pawh ka nei sang," a ti. French Open hma hian Rome-ah final lutin Belgrade Open nomawi a chawi bawk a ni.
Semifinal thlir lawkin Spanish star Nadal chuan, "Kan inhrechiang a, eng result pawh thleng thei a ni," tiin chak chiang turah a indah duh lo. French Open bikah chuan player pahnih intawna set 27 an khelh zinga 20 zet chu Nadal chan a ni hial.
