Euro 2020: Hriat tur pawimawhte
European football-a ram leh ram inelna sang ber khelh a nih dawn avangin khawvelin Europe lam a hawi a, football khawmpui lian hi khawthlang media-te titi tui ber a ni leh der tawh.
Euro 2020 hi zaninah khelh ṭan a ni dawn a, zan dar 12:30-ah Turkey leh Italy ten an khel ang - July 11 thleng inelna hi neih tur a ni a, thla tharah chuan European champion thar kan hre tawh dawn tihna a ni.
Khawpui 11
Euro 2020 hi khawpui 11-in an inthlen ṭawm dawn a, Amsterdam, Baku, Bucharest, Budapest, Copenhagen, Glasgow, Munich, London, Rome, Seville leh St Petersburg khawpuiah te inelna hi neih a ni dawn.
Dublin leh Bilbao chu inelna thleng tur zingah a tirah tel mah se stadium-a fan-ten inkhel an en theih dawn leh dawn loh chungchangah thutlukna an siam thei lo a, Seville leh St Petersburg khawpuiten an vanneih phah.
Player 26
Major tournament-ah dan pangngai ang chuan player 23 bak squad-a an awm a rem ngai lo. Mahse, Covid-19 vangin ram tin league-te an season a chep a, player-ten an tuar nasa.
Hei vang hian player chau lutuk tur ven nan squad tinah player 23 an awm remtihsak an ni a, inelna ṭan hnua Covid-19 vanga player-ten harsatna an tawh pawhin squad-a player tam hian engemaw chenah ram tin a pui thei ang.
A hmunah entu
UEFA chuan stadium-ah fan-ten inkhel an en vek theih tur thu an sawi a, St Petersburg leh Baku khawpui chuan stadium-a leng zat 50% in inkhel an en theih tur thu an sawi a, Budapest chuan stadium khata inkhel entu awmtir theih an tum.
Amsterdam, Bucharest, Copenhagen, Glasgow, Rome leh Seville khawpui ten 25% - 33% in inkhel an en theih tur thu an sawi a, Wembley (25%) leh Munich (22%) ten entu an nei thei nual dawn bawk.
• Ram 24-in inelna an hmachhawn ang.
• Group tina a sang pahnih chu last 16 lut chiang tur an ni.
• Group paruka pathumna ti ṭha zual pali chuan knockout round an lut ve bawk ang.
Group ṭhen dan
Group A : Italy, Switzerland, Turkey, Wales
Group B : Belgium, Russia, Denmark, Finland
Group C : Ukraine, Netherlands, Austria, North Macedonia
Group D : England, Croatia, Czech Republic, Scotland
Group E : Spain, Poland, Sweden, Slovakia
Group F : Germany, France, Portugal, Hungary
