Champion lai Iga Swiatek a tla

French Open hmeichhe singles champion lai Iga Swiatek chu Maria Sakkari hneh loin quarterfinal-ah a tla. Greece nula Sakkari hian Grand Slam semifinal a luhna hmasa ber ni turin 6-4, 6-4 in hnehna a chang.

Nilaini zan inkhel dangah Barbora Krejcikova chuan American tleirawl Coco Gauff chu 7-6 (8-6), 6-3 in a lo hneh ve bawk. Krejcikova leh Sakkari te hi nizan khan semifinal-ah an inhmachhawn zui leh a, result kan hre hman lo a ni.

Season hmasa khan beisei loh takin Swiatek-i'n nomawi a chawi, kuminah player langsar dangte an chet fuh loh bakah hliam vanga inhnukdawk an tam - Polish tleirawl hian title hum theihna remchang nei mah se a taksa a chau tih a hriat a, nidang a thaza tak ang kha hmuh tur a awm lo.

May thla tawpa kum 20 tling hlim Swiatek chuan, "Theihtawp chhuah mah ila chet fuh theih miah loh ni hi a awm ṭhin, chutiang chu tun ṭumah pawh ka chungah a thleng," tiin a chak loh a pawm thu a sawi.

Mipui hriat hlawh Gauff pawhin a tum ram a thleng zo lo. Kum 17 mi hian season danga a la thlen phak loh quarterfinal hial in vaw kai mah se Krejcikova lakah a ruh a la no deuh, chak lo mah se tun thla tawpa khelh tur Wimbledon atan erawh inrintawkna a neih belh nasa hle ang.