Euro-ah Wembley an khirh dawn!

Football khawvela inelna ngaihven hlawh ber pawl Euro 2020 khelh ni a hnai tial tial a, chanchinthar hriat tur a awm zel - inelna thleng tur zinga mi Wembley Stadium-ah chuan Covid-19 hri danna la tawh leh negative result nei lo chu an lut thei dawn lo!

European football-a thuneitu sang ber UEFA chuan Thawhlehni khan Wembley Stadium lut tura tih ngaite hi a puang a, kum 11 chung lam, stadium-a lut turte chu Covid-19 an kai leh kai loh enna, Lateral Flow Test (LFT) negative result an nei tih chianna an keng tur a ni a, a nih loh chuan Covid-19 dannain an inchiu tawh tih lanna a tel a ngai thung.

UK khua leh tui tan chuan LFT 'negative' result emaw hri dannain an inchiu ngei tih chianna emaw, an duh zawk zawk, stadium luh nan rin theih a ni a, test result hi stadium gate hawn a nih aṭanga chhutin darkar 48 aia a hlui a thiang lo.

Hri danna an lak hmanga lut duh tan pawh, inkhelh en hma ni 14-ah tal khan hri danna an la tur a ni a, hemi hnua hri danna lakin awmzia a nei dawn lo tihna a ni - hri danna hi dose hnih anga la kim tan chauh a ni ang.

UK pawn lam mi tan chuan LFT 'negative' result chiah rin theih a ni a, private company lama PCR test result-te chu pawm a ni dawn lo.

UEFA chuan fan-te chuan an ruahmanna chu June 13, 18 leh 22-a Wembley Stadium-a match khelh tur atana ruahman a nih thu an sawi a, match dang khelh tur atana inkaihhruaina chu a ṭul dan a zira tihdanglam a nih tur thu leh tihchian vat a nih tur thu an sawi.

European football thuneitu sang chuan inelna him tak neih chu an duh leh tum ber a nih thu an sawi a, "Tualchhung sorkar leh health lam thuneitute nen mipui vantlang himna ngaihtuah chungin kan thawk ho reng a ni," an ti.

Fan-te chu mobile phone-a an ticket soft copy nei vek tura tih an ni a, ID ken ngei ngei tur a ni a, hmai tuam tur a ni bawk - metre khat tala fan-te inhlat tur a ni a, midang nena inkuah emaw, in chibai emaw ang chi reng reng khap a ni.

Wembley Stadium-ah hian stadium-a leng zat fans 25% ( 22,500) in a hmunah inkhel an en thei dawn a, group D-a England match thum chu a thleng vek dawn - he group-ah hian Croatia, Scotland leh Czech Republic-te nen Three Lions hi an awm ho.

UK chhunga mi tho Hampden Park, Scotland-ah chuan Wembley angin negative result leh hri danna la tih chianna ken kher a ngai hran dawn lo a, Glasgow khawpuia stadium hian Scotland match zawng a thleng thung ang.

Wembley hian last 16 match hnih, semifinal leh final a thleng dawn bawk a, Hampden Park erawhin group stage match bakah last-16 match khat bak a thleng dawn lo.

Euro 2020 hi ṭum dang ang lo takin a thlengtu bik an awm dawn lo a, khawpui 11-ah nghah tur niin London leh Glasgow bakah Rome, Munich, Baku, St Petersburg, Budapest, Seville, Bucharest, Amsterdam leh Copenhagen khawpuite chuan inelna hi an thleng ve dawn bawk.