Nuggets lakah Suns an chungnung

Nimin zing khan Phoenix Suns chuan Denver Nuggets lakah 123-98 in hnehna an chang a, Western Conference semifinal series-ah 2-0 in hma an hruai fal ta. June 12, Inrinni zing dar 7:30-ah game 3 an khel leh ang.

Suns tan hian kum 36 mi Chris Paul chuan point 17 a neih bakah assist vawi 17 a nei a, assist hetiang zat nei chunga turnover a nei miah lo hi NBA record thar a ni, tun hmain hetiang ti thei hi an la awm ngai lo.

Devin Booker-a'n point 18 a nei bawk, Suns tana inkhel bul ṭantu player panga ten point 10 chuang an nei vek - playoff chungin a zawna match nga an chak theih nan an khel ṭha rual tlang thei hle.

Denver tan NBA Most Valuable Player atana thlan thar Nikola Jokic chu player langsar ber a ni. Serbian star hian 24 point, 13 rebound leh assist vawi ruk a nei; khel ṭha viau mah se a team chakpui nan a tawk zo lo.

Nimin zing khan NBA chuan mimal chawimawina dang an puan belh. Utah Jazz player Rudy Gobert chu 2020-21 Defensive Player of the Year atan thlan a ni a, 7ft 1in zeta sang hian he chawimawina hi a vawi thum dawnna a ni.

Gobert chuan, "Ka naupan laia basketball ka khelh tirh khan, engtik niah emaw chuan NBA Defensive Player of the Year i la ni ang tiin min hrilh se chu ka awih lo ang. Tunah chuan a vawi thum nan ka dawng ta si, beisei phak loh thil a ni," a ti.