Belgium hun a inherchhuak dawn?

Euro 2020 hi Belgium tan champion hun a nih loh chuan engtik hunah eng ni tawh chuang ang? Rualkhat ṭha bik (Golden Generation) an neih mek hian nomawi an la chawi lo a, tun ṭumah hian ram dang huphurh bik nei miah loin an inlan dawn.

Belgium hi Group B-ah Denmark, Finland leh Russia te nen an awmkhawm dawn - Roberto Martinez enkawl Red Devils hian harsa lutuk loin knockout stage an luh a rinawm, chutih rualin an awmpuite thlirin chetsual theihna a ni ve tho.

KDB a dam
Champions League final-ah Kevin De Bruyne a inhliam a, Manchester City midfielder hi enkawl a ngaih avangin Thawhlehni khan an ram team a zawm ve thei chiah, a ṭhiante dang angin training a nei rei hman lo tihna a ni.

June 12, Inrinni zanah Russia nen an inkhel dawn a, an match hmasa berah chuan KDB hi an la dim deuh a nih pawhin a mak lo ang. De Bruyne a awm loh pawhin Eden Hazard leh Romelu Lukaku an awm avangin tlarhma lam an ngaihtuahawm lo.

Goal veng turin Real Madrid keeper Thibaut Courtois an nei a, ani aia ṭha duh thlan tur an awm kher lo ang. Chutih rualin an defender-te erawh an kum a tam ve hlawm ta deuh, champion tur chuan goal khung ai mahnin a venhim lam an dah pawimawh zual a ngaih a rinawm.

Champion tawh
Euro 1992-ah Denmark an champion, kuminah hian champion tura rinkai ni lo mah se team lian dangte hneh thei turin theihna an nei. Player langsar an nei nual a, midfield-ah Christian Eriksen, Thomas Delaney leh Pierre-Emile Hojberg te an inkawp dawn, an en tham khawp ang.

Mansger Kasper Hjulmand enkawl team hian World Cup qualifier an khelh hnuhnung pathumah hnehna an chang vek, goal 14 khungin anmahni lamah a lut miah lo - Euro atana inbuatsaih nan chuan a ṭha tawk hle.

Keeper Kasper Schmeichel leh a hma a ding Andreas Christensen leh Simon Kjaer te an khawng ṭha viau a, inrintawkna an neih san bawk avangin tawh an khirh dawn. Barcelona striker Martin Braithwaite erawh chhuang taka sawi hluai tur a ni lem lo.

A vawi khat nan Finland
Euro 2016 qualifying-ah khan Finland hian chak ni hmel an hmu miah lo, inelna an hmachhawn 11-ah vawi kua an tlawm. Dinhmun che taka an din laiin manager atan Markku Kanerva an ruat a, kum nga a liam leh meuh chuan Euro an khel dawn.

Kum 57 mi Kanerva hian zawimuangin team a din a, a hun hmasa lama school zirtirtu (teacher) ni ṭhin hian an ram hi a vawi khat nan major international tournament a hruai thlen miau avangin an thlen chin pawh hi a ropui tawh.

Finland hian Premier League lama goal khung fo tawh Teemu Pukki an kawl. Norwich City striker hian season liam ta khan Championship match 41 a khelh aṭangin goal 26 a khung, goal hmaah a hriam tawk viau.

Cherchesov awmna
Russia team pumpui thlir chuan coach Stanislav Cherchesov a langsar ber. Cherchesov kaihhruaina hnuaiah hian 2018 World Cup-ah khan ranking hniam ber ni chungin inlan mah se quarterfinal an thleng thei, penalty shootout-ah Croatia lakah an vanduai.

Best FIFA Men's Coach Award 2018 dawng thei tur zinga chhawp chhuah ni phak Cherchesov-a'n a naute a hrechiang tawk viau, qualifying-ah pawh Belgium chiah tluk loin an group-ah pahnihna an ni phak.

Russia tan last 16 lut tur chuan an tlarhnung remphui a ngai dawn, kum 2020 hnu lama match 11 an khelh tawhah goal 18 an chhuah a, goal chhuah lohna inkhel vawi hnih chiah an nei.