Spain 'thar' leh beiseina

Euro 2008 leh 2012-ah a zawnin Spain an champion a, a kar lakah World Cup (2010) nomawi an chawi bawk - mahse, hmanni lawk emaw kan tih kha thawnthu hlui an chang leh tawh.

World Cup 2014-ah group stage-ah an tla a, Euro 2016-ah last 16 chu an tlin tawk a ni - World Cup 2018-ah thawnthu a danglam lo a, last 16-ah bawk an tla.

Luis Enrique hoin Spain an indinthar mek a, Euro 2020 inbuatsaih nana Portugal nen an inkhelah goal lut lo mah se an game a hmuhnawm a, Spain fan-ten beiseina sang tak an nei thar leh tawh ang.

Enrique-a'n player 26 koh theih aṭangin 24 bak mamawh loah a inngai a, Real Madrid captain Sergio Ramos chu in fit tawk loh avangin a ko lo ngam bawk - France-in an koh duh loh avanga Spain tana inlan thlang Aymeric Laporte a ko thung.

La Roja vanglai angin he team hian player langsar kawl hnem lo mah se an game a mawi a, Thiago, Marcos Llorente, Koke leh Gerard Moreno-te ho hi champion pui tham player an ni tih hriat tel a ṭha.

Spain hian Euro khel turin qualifier match 10-ah vawi riat hnehna an chang thei a, an lamah vawi nga chiah a lut - group stage match hi Seville khawpuiah an khel vek dawn bawk. Hetihrual hian Spain hi captain Sergio Busquets leh defender Diego Llorente-ten Covid-19 an kai avangin a huhoa training pawh nei thei loin an awm mek a, he thu buatsaih a nih thleng hian hri kai thar erawh an awm rih lo.

Group E-a Spain khingpui tur Sweden, Poland leh Slovakia hi chetsual theihna vek an ni. Janne Andersson-a'n Sweden a enkawl hnuah 50% hnehna a chanpui thei a, World Cup 2018-ah quarterfinal a hruai thleng bawk.

Zlatan Ibrahimovic-a'n Euro khel thei dawn ta lo mah se La Liga-a goal 17 khungtu Alexander Isak an nei a, Juventus midfielder Dejan Kulusevski hi kum 21 mi lek ni chungin a rintlak viau bawk.

Poland-in goal khung turin Robert Lewandowski an nei a, season hman zawh takah Bayern Munich tan match 40-a goal 48 khungtu chet ṭhat leh ṭhat loh hian Poland thlen chin tur thui takin a hril ang - Napoli striker Arkadiusz Milik-a'n a thlawp ṭhat a ṭul ang.

Goal veng turin tawnhriat nei ṭha, Juventus keeper Wojciech Szczesny a awm a, Lokomotiv Moscow midfielder Grzegorz Krychowiak hi Sevilla tan season hnih lek a khelh chhunga Europa League squad of the season (2014-15, 2015-16) leh La Liga team of the season (2014-15) a lang thei a ni a, danglamna thlen turin a ṭha tawk.

Group E-a rin hlawh lo ber chu Slovakia tih ngam a ni a, captain Marek Hamsík hi Napoli-a a vanglai ang a ni tawh lo bawk - mahse, he team hian centre back-a ding tur Milan Škriniar an nei a, ani hi Inter Milan-in Serie A nomawi an chawina tura player pawimawh a ni.

Hertha BSC defender Peter Pekarík leh Newcastle United keeper Martin Dúbravka-te an nei bawk a, tlarhnung lam chu an innghahna tur a ni ang.