Rin hlawh tawk lo Netherlands!

Major tournament-a a zawna vawi hnih zet an inlan loh hnuah Netherlands chu Euro 2020-ah an inlan ve leh dawn ta a, he team hi team pangngai tak ni mah se an coach Frank de Boer-a'n tun hnaiah sulhnu a neih ṭhat tawk loh avangin rin an hlawh lo.

Oranje hian kumina team ṭha an hmachhawnah hnehna an la chang lo - Turkey chu World Cup qualifier-ah 4-2 in an ngam lo a, ram tenau Latvia, Gibraltar leh Georgia an hneh a, Scotland an inhnehtawkpui.

Netherlands hian captain Virgil van Dijk chu hliam vangin an hruai ve thei lo bawk a, hei ringawt pawh hi chhiatpui tham a ni - chutihrual chuan group C-a an elpui turte hi Ukraine, Austria leh North Macedonia an nih avangin harsatna nei loa last 16 chu lut mai tura ngaih an ni.

De Boer rin harsa mah se Netherlands player neih ṭhat dan erawh hmuh hmaih chi a ni lo a, Juventus centre back Matthijs de Ligt, Barcelona midfielder Frenkie de Jong, Paris Saint-Germain zawm tur anga sawi Georginio Wijnaldum, Barcelona nena sawi zawm Memphis Depay leh VfL Wolfsburg tan season hman zawh taka goal 25 khungtu Wout Weghorst-te an nei.

Netherlands hian World Cup 2010-ah khan final an lut a, 2014-ah semifinal an lut bawk. Mahse, Euro 2016 khel turin an tling zo lo a, World Cup 2018 an inpetkai lo bawk.

Kum 1988-a Euro champion lo ni tawh Oranje ṭantute chuan an ropuina kha tuna an player-te hian an neih let pui theih an beisei a, World Cup 2010-a assistant coach De Boer hoa an thlen theih chin tur hi hriat a châkawm ta hle.

AC Milan legend Andriy Shevchenko kaihhruaina hnuaiah Ukraine an khel dawn a, an ram chanchina a vawi khat nan Euro-ah last 16 luh an tum ang.

Ukraine-in Shevchenko vanglai anga player sawi vul chuk tur an nei lo a, chutihrual chuan tlarhmaa an player neih Gent striker Roman Yaremchuk hi danglamna thlen thei player a ni.

West Ham winger Andriy Yarmolenko hi theihnghilh a thiang lo a, Manchester City wing back Oleksandr Zinchenko a awm bawk - zuam sual theih an ni ang.

An ram chanchina a vawi khat nana a zawna Euro khel tur Austria-in Euro-ah knockout round an la lut ngai bik lo a, mahse, he team hian RV Leipzig midfielder ṭha mi Marcel Sabitzer, Shanghai Port striker Marko Arnautovic, Eintracht Frankfurt centre back Martin Hinteregger, VfB Stuttgart tana season hman zawh taka goal 17 khungtu Saša Kalajdžic leh Real Madrid defender thar David Alaba-te an nei a, group stage-a lungawi tur an ni lo.

Group C-ah chuan North Macedonia hi rin hlawh lo ber tih ngam an ni a, mahse, he team hi April 1 World Cup qualifier-a 2-1 a Germany hnehtu kha an ni tih theihnghilh loh a ṭha.

Kum 2010 Inter Milan treble champion ṭuma match 42 khel thei Goran Pandev chu captain a ni a, Napoli midfielder Elif Elmas leh Leeds United player pawimawh Ezgjan Alioski-te an awm bawk avangin chetsual theihna an ni - major tournament-a an vawi khat inlannaah last 16 an mitthla ngam ang.