England-in Wembley-ah nomawi an chawi dawn em?

Euro 2020 khelh hun a thleng dawn a, major tournament khelh a nih dawn apianga dan pangngai angin England bawk chu thawm nei na an ni leh ta.

World Cup 2018-a England-in semifinal an luh khan 'Football is coming home' (Football a lo kir dawn e) tiin fans an zai rual dual dual a, mahse, Croatia ngam loin an zinkawng a tawp.

Three Lions an hnual phah lo - UEFA Nations League an khel zui a, semifinal an inpetkai. Mahse, World Cup ang thoin thawnthu a danglam lo a, a sang pali chu an tawpna a ni.

England boss Gareth Southgate chuan, "Semifinal aia hniama kan tawp chuan hlawhchhamna a ni ang. Major tournament-ah semifinal vawi hnih kan lut tawh a, kan tih leh tur chu final luh a ni," a ti!

Hmabak chu
England hi group D-ah an awm a, an elpui turte hi Croatia, Scotland leh Czech Republic-te an ni a, an match hmasa berah June 13 zan hian Croatia an hmachhawn dawn.

Croatia hi World Cup 2018 semifinal-a England-in an ngam loh kha an ni a, Scotland leh Czech Republic hi chet sual theihna tur team an ni bawk.

Southgate ṭawng pawr viau mah se Three Lions tan kalkawng a awlsam dawn lo tih a chiang a, chutihrual chuan England hian an group stage match zawng zawng Wembley-ah an khel vek dawn.

Euro semifinal leh final hi Wembley Stadium-in a thleng dawn bawk a, Three Lions tan tun hi mahni mual ngeia nomawi lian tham chawina remchang a ni.

England an ṭha
Ṭum dang ang thoin squad en mai chuan England an ṭha a, a pawimawh ber chu club-a an khelh dan anga an khelh leh khelh loh a ni mai - tlarhmaah Raheem Sterling, Harry Kane, Jadon Sancho, Marcus Rashford leh Phil Foden-te ho an awm a, a manganthlak loh.

England hian midfield-a khel tur pawhin Mason Mount, Jude Bellingham leh Jack Grealish an nei a, chutihrual chuan midfield laia Kalvin Phillips leh Declan Rice hi major tournament-a England chet ṭhatpui tura rin an harsa - tawnhriat nei ṭha Jordan Henderson lah hliam damkawr a ni.

Southgate-a'n full back-ah chuan awihawm loh khawpin duhthlan tur a ngah a, Kyle Walker, Luke Shaw, Ben Chilwell, Reece James leh Kieran Trippier-te ho an awm - mahse, a laia John Stones dinpui tura duhthlan tur an neih hi duh aiin a 'pan' hret.

Jordan Pickford hi keeper ṭha pangngai tak ni mah se tihsual neih a ching a, kum 27 mi Everton keeper hi Southgate-a'n Dean Henderson aia a ring dawn a nih chuan thlamuanpui a har ang.

Team dang
Luka Modric hoin Croatia an rawn thawk chhuak leh dawn a, kum 35 mi a nih tawh avangin World Cup 2018-a player hmuhnawm bik kan hmuh ang erawh a ni tawh lo.

Mahse, Croatia hi Inter Milan midfielder Marcelo Brozovic, forward Ivan Perisic leh Hoffenheim forward Andrej Kramaric-te awmna an ni tih hriat a ṭha - Kramaric hian season hman zawh takah khan Hoffenheim tan match 34-ah goal 25-a khung.

Czech Republic hi sawi vul chuk an har a, mahse, kum 1996-a England-in Euro an thlen ṭum khan khatihlaia Czech 'golden generation' chuan final an lut - England-ah he thawnthu ngaihnawm hi ziah nawn an duh dawn.

World Cup 1998 hnua major tournament la khel leh lo Scotland-in Euro an khel dawn a, Liverpool left back Andy Robertson hoin an inlan dawn - sang tak thlen beiseiawm lo mah se group stage-a an match hnih chu Scotland-ah an khel dawn a, last 16 luh chu beisei ngam tur an ni.