George Floyd lamah infiammite an ṭang

England forward Jadon Sancho chuan Pathianni zana Borussia Dortmund tana goal a khung zawhah a lawm nan a jersey a phelh a, a kawr hmaa 'Justice for George Floyd' tih chuanna chu a pholang. George Floyd hi mihang niin May 25, 2020 khan Minneapolis police kut tuarin a thi.

Bundesliga inkhel dangah Borussia Moenchengladbach tana goal khungtu Marcus Thuram pawhin 'George Floyd' a pualin a goal khung zawhah a ṭhingṭhi. Mihang footballer pahnih hian an football thiamna chu 'racism' dona remchang atan an hmang a, chi leh chi inthliar an duh loh thu an puang chhuak.

Dortmund tana hattrick siamtu Sancho chuan, "Ka hattrick hmasa ber avangin ka lawm a, chutihrualin khawvelah thil ṭha lo thleng a tam a, kan thlak danglam a ṭul. Kan dikna leh chanvo puanchhuah kawngah ka dawih tur a ni lo a, diknain ro a rel theih nan kan pen chhuak tur a ni. Kan ṭanrualin kan chak lehzual a, George Floyd chungah diknain rorel rawh se," tiin instagram-ah a ziak.

Sancho hian kawr a phelh avangin yellow card a hmu a, inkhelh banah Dortmund boss Lucien Favre chuan, "Thil inziak ka hmu lo a, a tih chhan ka hre lo a, sawi tur ka nei lo," tiin a sawi zui lo thung.

Gladbach manager Marco Rose erawhin Thuram-a thiltih a hriatpui. Rose chuan, "Tih chhan ṭha tak a nei. Racism a duh lo tih a lantir a, hemi kawngah hian kan thlawp vek. Mi zawng zawngin thlawp ve se ka duh a, a rilru put hmang ang hi pu vek se ka duh," tiin racism a duh loh thu a sawi.

Inrinnia Bundesliga inkhelah pawh Werder Bremen player Weston McKennie chuan 'Justice for George Floyd' tih a hreng. Club sporting director Jochen Schneider chuan, "Kan player thil tih hi 100% in kan thlawp," tiin McKennie lama an ṭan thu an sawi.

American tennis player Serena Williams, vawi 23 Grand Slam champion tawh chuan instagram-ah a lungawi lohna a inhri thla a, a lungawi lo hle. 

Grand Slam vawi hnih champion tawh Naomi Osaka chuan, "I chunga a thlen loh vang ringawtin a thleng lo tihna a ni lo," tiin a chungah thleng lo mah se 'racism' la awm reng chu a pawm loh thu a sawi.

Wimbledon 2019-a beisei phak baka che ṭha kum 16 mi Coco Gauff pawhin instagram-ah mi ngo leh thuneitute laka thi mi hang thlalak a tar chhuak a, "A dawt ka ni em? Engtikah nge a tawp dawn? Engtikah nge mihring angin min en dawn?" tiin a ziak.

George Floyd thihna avang hian Formula 1 champion Lewis Hamilton, Liverpool striker Rhian Brewster leh Kobe Bryant-a nupui Vanessa Bryant te pawh an ṭawng chhuak a ni.

George Perry Floyd hi October 14, 1973 khan Fayetteville, North Carolina-ah a piang a, Houston, Texas-ah sei lianin Yates High School-ah a kal. Kum 46 mi Floyd hi Yates High School-a a kal lai hian basketball leh football team (American football)-ah a tel a, football-ah hian 1992 state championship final a thlenpui hial.

Floyd hian South Florida Community College-a a kal laiin kum 1993-1995 chhung khan baskebtall a khel a, hemi hnu hian a chenna Houston-ah a let. Hetah hian rap lamah kalin 'Big Floyd' hminglem a invuah a, kum 2014 khan Minnesota-ah a pem a, restaurant-ah security hna a thawk.

Covid-19 vangin Floyd hian a hna a chan a, a thih lai hian hna a nei lo a, a fanu pahnih a kalsan. A chhungte leh a ṭhiante chuan pa zaidam tak niin Floyd hi an sawi.

May-a Thawhṭanni hnuhnung ber hi American-te chuan Memorial Day atan an hmang. United States Armed Forces tana hnathawh laia thite hriatrengna hun a ni a, chawlh a ni. Kuminah chuan May 25 hi Memorial Day a ni a, vanduaithlak takin hemi ni hian thil duhawm lo a thleng.

Minneapolis-a dawr pakhat hnen aṭangin George Floyd hian pawisa lem ($20) hman a tum tih an dawng. Police-te hian Floyd hi thu a zawm ṭha loah an puh a, video-ah erawh Police an mualpho. Police officer pali zinga pakhat Derek Michael Chauvin chuan Floyd hi a khupin leiah a nghawngah a nawr bet.

Floyd hian a thawk theih loh thu a sawi a, that lo turin a ngen bawk. Heti chung hian Police officer Chauvin hian minute 8 leh second 46 zet leiah a nawr bet a, a nunna a chan phah. Chauvin hi tualthata puh a ni a, a hna aṭangin an ban bawk. He thihna hi chi leh chi inthliarna (racism) vanga thlengah an ngai a, US lamah buaina a nasat phah hle.