Jadon Sancho-a'n hattrick a siam Dortmund leh Gladbach an chak chiang

Jadon Sancho-a'n a career hattrick hmasa ber a siam a, Borussia Dortmund-in table mawngphaha awm Paderborn 6-2 in an sawp. Pathianni zan Bundesliga inkhel dangah Borussia Monchengladbach-in Union Berlin 4-1 in an hneh ve bawk. 

Bundesliga-ah Dortmund-in point 60 an hmu a, an hnuaia awm Gladbach leh Bayer Leverkusen ten point 56 ve ve an hmu. Nizan khan RB Leipzig leh FC Cologne te an inkhel a, Julian Nagelsmann-a kaihhruai Leipzig hi an chak a nih chuan pathumnaah an inhlangkai thei ang.

Bayern Munich nena an inkhelh ṭumin Dortmund striker Erling Haaland leh midfielder Mahmoud Dahoud te an inhliam a, Dahoud hi hliam vangin tun season khelh hmabakah a inlan thei dawn lo. Norwegian striker erawh khup hliam vangin Paderborn hmachhawn thei lo mah se kartawpa Hertha Berlin an hmachhawn hunah chuan a inlan theih a beiseiawm.

Dortmund tana bul ṭantu zingah Jadon Sancho rawn telin tlarhmaah Thorgan Hazard leh Julian Brandt te nen an inkawp. Lucien Favre hote hian inkhel thunun mah se first half-ah table mawngphaha awm Paderborn lakah goal khung an harsat.

Hun chanve hma lamah Hazard-a'n chance ṭha ṭum hnih a hlah a, Raphael Guerreiro leh Brandt te pawhin goal khung theihna tur hun an bawh pelh bawk. Dortmund-in inkhel an thunun a, amaherawhchu Paderborn laka goal an khung loh avangin insiamṭhat an mamawh hle.

Second half-ah Borussia Dortmund-in inkhel an thunun satliah lo a, an goal bawh a na lehzual. Ṭan phatah Achraf Hakimi-a'n Paderborn keeper Leopold Zingerle tan hna a siam nghal. Minute 52-naah Sancho-a'n a thiamna a pholang a, a ball pass ṭha tak chu Hazard-a'n goal ruakah a khung.

Goal khat vangin Paderborn tlarhnung a pawp a, goal dangin a chhunzawm. Minute 57-naah Emre Can-a cross keeper Zingerle-a'n dang ṭha tawk loin Sancho-a'n awlsam takin a khung. Mualneitu lamin Can-a handball vangin penalty an hmu a, minute 72-naah Uwe Hunemeier-a'n goal-ah a chantir.

Paderborn-in beiseina an nei rei lo a, minute hnih hnuah Sancho-a'n nalh takin a pet goal. Minute 85 leh 89-naah Acharaf Hakimi leh Marcel Schmelzer ten an khung belh a, minute 90 chhungin Dortmund-in goal nga an khung. Injury time-ah Sancho a rawn lang a, Dortmund tana a hattrick hmasa ber ni turin a pet goal a, 6-1 in hnehna an chang.

Borussia Park-ah Borussia Monchengladbach-in harsatna an tawk lo. First half-ah Florian Neuhaus leh Marcus Thuram te hmangin hma an hruai a, second half-ah Union Berlin tan Sebastian Andersson-a'n a khung. Amaherawhchu Thuram-a'n minute 59-naah a goal hnihna leh Gladbach goal thumna a khung a, Alassane Plea-a'n minute 81-naah chak nemnghehna a khung leh bawk.

Bundesliga-ah Bayern Munich an kal fawr leh tawh avangin champion turah inhnialna tur a awm tawh lo a, Champions League inchuh boruak erawh a ngaihnawm chho hle. Gladbach-in result ṭha an neih avangin pahnihna Borussia Dortmund pawh hi season thara Europe inelna sang ber khel lo thei dinhmunah an ding.