World Cup 2018 semifinal 'rematch' - England vs Croatia

Kum 1966 chanchin sawi dawn chuan 'black & white' mitthla thiam a ngai a, chutihlai chuan Mizoram pawhin India laka inlakhran tumin chengrang a la chawi a, hmanlai thawnthu mai an chang tawh.

Chutiang taka rei tawhah chuan England-in World Cup nomawi an chawi a, major tournament nomawi chawi turin kum 50 chuang an nghah leh a la ngai dawn tih reng an hre lo - kum 55-a liam a, Three Lions nomawi hunnaah '1966' tih chuanna nomawi bak hun belh a la ni ta lo cheu.

Euro 1996-a her chhuak a, football khel hmasa ram England-in, "Football is coming home," an ti a, an ram ngeia inelna hmachhawn an nih bawk avangin champion beiseina an nei sang hle - mahse, semifinal-ah Germany an ngam lo.

World Cup 2018-ah kum 1996 hnua a vawi khat nan major tournament semifinal an lut a, an ngam loh chu Croatia an ni. Euro 2020-a her chhuak a, England-in phuba lakna hun ṭha an nei - Pathianni zan dar 6:30-ah Croatia nen an match hmasa ber an khel dawn.

England awmna group D-ah hian Scotland leh Czech Republic an awm bawk a, team pahnih inhmachhawn hun tur erawh Thawhṭanni zan dar 6:30-ah a ni thung.

Hmanlai hian maw...
June 26, 1996 a ni a, Wembley Stadium, England-ah fans 75,862 zet an pungkhawm a, an thawm rinzia chu thua sawifiah chi a ni lo - rinna chak lo fal tan chuan mithianghlim lawr a thleng emaw tih mai tur a ni.

Mahse, a ni lo - England leh Germany-ten Euro semifinal an khelh vang zawk a ni. Minute thumna lekah England striker chhuanvawr Alan Shearer-a'n goal hmahruai a khung a, Wembley-a chim dawn emaw tih mai tur khawpin thawm a ring.

Three Lions hlim chhung erawh a rei lo. Minute 13-a liam a, Stefan Kuntz chuan Germany tan si phurh a sut a, hriau thlauh tan pawh a ri a hriat theih ang, tih tur khawpin thawm a reh leh thung. Extra time an khel a, Paul Gascoigne-a'n England tan uiawm lutukin a hlah.

Penalty hmangin chak zawk zawn a ni zui a, Germany player parukin an pet goal vek laiin England tan panga chiahin an pet goal thung - penalty hlahtu hi tuna England boss Gareth Southgate a ni a, coach Terry Venables dara a lu nghat chungin a ṭap a, Wembley chu mitthi sun hlim ang maiin a reh.

Phuba lak hun
Euro 1996-ah Southgate-a penalty hlah avangin England-in final an lut lo a, 'golden generation' hming chawi meuhin David Beckham, Steven Gerrard, Frank Lampard, Paul Scholes, Michael Owen, Wayne Rooney, Rio Ferdinand leh John Terry-te ho lo chhuak mah se ram tan eng nomawi mah an hlawh chhuak thei chuang lo.

September 2016-a lo her chhuak a, England-in coach atan kum 1996-a penalty hlahtu Southgate an lalut. Coach anga tawnhriat nei tam lo a nih avangin rin erawh a hlawh lawk lo.

Mahse, World Cup 2018-a her chhuak a, amah ringhleltute chhangin Southgate-a'n a team hi semifinal a luhpui a, mahse, semifinal mangchhiain Southgate-a kiansan thei lo - Croatia lakah an tlawm.

Euro 2020 a her chhuak a, inelna thleng tura thlan khawpui 11 zingah London a tel - Wembley Stadium-in group stage match thum, last 16 match hnih, semifinal leh final a thleng dawn. Three Lions tan tun tluka Euro 1996 thawnthu kha thawnthu ngaihnawm zawka thlakna hun ṭha a awm lo a, tun tluka Croatia laka phuba lak châkawmna hun a awm chuang lo.

England vs Croatia
Squad en mai chuan England squad an chhah ṭha a, chutihrual chuan tawnhriat nei tlem player an la tam avangin team ṭha Croatia laka chak tura dah nghal ngawt chu thil harsa a ni.

Croatia-in midfield-ah Luka Modric, Inter Milan midfielder Marcelo Brozovic leh Chelsea midfielder Mateo Kovacic an nei a, player pathum thiam bik hmang hian an game siam an tum dawn.

Hemi chhu chat turin Southgate-a'n midfield a ngaih pawimawh a ṭul dawn a, Jordan Henderson chu hliam damkawr a la nih avangin Kalvin Phillips leh Declan Rice a luhtir a rinawm - a tawi zawnga sawi chuan he inkhel hi midfield indona ni tura ngaih a ni.

Midfield leh tlarhma thlun zawm turin Mason Mount chu lut tura ngaih a ni a, tlarhmaa Harry Kane thlawp turin Raheem Sterling, Marcus Rashford, Jadon Sancho leh Jack Grealish-te duhthlan tur a nei.

Panna lai
England-in tlarhnungah hliam vangin Harry Maguire an la chhawr thei dawn lo a, a laia John Stones dinpui turin Ben White aiah Tyrone Mings a luh a rinawm zawk - si ban nghak turin Jordan Pickford a lut bawk ang.

Three Lions-in full back nei ṭha mah se centre back lam hi buaina a ni. Stones dinpui tur Mings hi rin ngam a harsa a, White lah tawnhriat nei tlem tak defender a ni bawk - tlarhnung hi England panna lai tak tur a ni.

Croatia-in tlarhma lama goal nawr turin Inter Milan forward Ivan Perišic, Osasuna striker Ante Budimir, season hman zawh taka Hoffenheim tana goal 25 khungtu Andrej Kramaric, AC Milan forward Ante Rebic, Dinamo Zagreb forward Bruno Petkovic, VfL Wolfsburg winger Josip Brekalo-te an nei a, England tlarhnung an ngaihtuahawm!

Atletico Madrid defender Sime Vrsaljko, Zenit Saint Petersburg centre back Dejan Lovren, Rangers full back Borna Barišic, Marseille centre back Duje Caleta-Car leh Besiktas defender tawnhriat nei ṭha Domagoj Vida te chu Croatia-in tlarhnunga duhthlan tur an neih an ni bawk a, England tan a awlsam dawn lo.

Kan result aṭangin teh kan ni dawn a, team pakhat chauhin Euro nomawi an chawi thei thung - chu chu vawi khatmah kan la tih ngai loh a ni a, a vawi khat nana thlentir châkin kan tuihal a ni. - Gareth Southgate, England manager