Parken stadium-a khel tur Denmark

Euro 2020 group B team pali zingah Belgium an ṭha fala ngaih a ni a, Red Devils elpha ve tura ngaih Denmark leh Russia te inelna thlengtu zingah an tel. Euro 1992 champion Denmark hian an mual Parken stadium-ah group match zawng zawng an khelh dawn avangin knockout stage luh an inbeisei hle.

Denmark hian zanin dar 9:30 hian an group-a team nem bera ngaih Finland an hmachhawn dawn a, point thum hlawhchhuah ngei an mamawh ang. Danish Dynamite hi tlarhnungah captain Simon Kjaer leh Leicester City keeper Kasper Schmeichel ten an ho thei dawn a, Lammuala inkhel tawh Jannik Vestergaard leh Chelsea defender Andreas Christensen thlengin an awm.

Ram tana vawi 107 khel tawh Kjaer chuan, "Ka football career-ah hian kan ram ngeia Denmark tana Euro ka khel tur hi ka lawm a, ka hun tawn tawhah hei aia hlu a awm chuang lo," tiin a sawi. Denmark hi tlarhma lam pawh an zia hle. Inter Milan midfielder Christian Eriksen-a'n a ho a, tlarhmaah Barcelona forward Martin Braithwaite leh RB Leipzig forward Yussuf Poulsen te an awm. Denmark hi point thumah chauh an lungawi dawn a, amaherawhchu Finland hian goal khung thiam Teemu Pukki an kawl tih hriat a ṭha a, Norwich City striker hi a inhliam a dam hman niin khawthlang media ten an tarlang.

Bul ṭan tura beisei
Denmark: Schmeichel; Maehle, Kjær, Christensen, Wass; Eriksen, Hojbjerg, Delaney; Poulsen, Wind, Braithwaite
Finland: Hradecky; O'Shaughnessy, Arajuuri, Toivio; Uronen, Kamara, Sparv, Lod, Raitala; Pukki, Pohjanpalo