Buaina karah Copa America an khel dawn

South America ramte khu European ram angin an hausa tawk lo a, ram changkang tana chinfel mai theih pawh an tan buaina lian a tling fo - Copa America 2021 chu hri leng vanga buaina karah June 13, Pathianni zan dar 2:30 aṭangin an khel ṭan dawn.

Media an chak tawk lo a, khawvelin a hle lar tawk lo a ni mai thei. Mahse, South American ramte khuan tunhma aṭangin football khel turin 'talent' an nei, team ṭha an nih bakah mimala thiam fal an kawl ṭhin avangin football ngainatu tan hmaih chi a ni chuang lo.

Inelna thlengtu Brazil leh Venezuela ten Estadio Nacional de Brasilia-ah match hmasa ber an khel dawn, inkhelh hun hi zan dar 2:30 leh zing dar 5:30 a nih ṭhin dawn avangin Mizote tan chuan men rei emaw, thawh hma viau emaw a ngai ṭhin ang.

Team 10
Copa America hi ram 12-in an khel ṭhin, South American Football Confederation hnuaia ram 10 bakah - North America emaw Asia khawmualpui emaw aṭangin ram dang pahnih an sawm belh ṭhin.

Kuminah hian tun hnaia Asian Cup champion hnuhnung pahnih Australia leh Qatar te chu inlan tura sawm an ni, mahse hripui leng vangin football kalphung a buai a, 2022 World Cup qualifier khelh an ngaih avangin ram pahnih hi a inhnukdawk.

Ram 10 chauh an inel dawn, Group A-ah Brazil, Colombia, Ecuador, Peru leh Venezuela an awm ang; Group B lamah Argentina, Bolivia, Chile, Paraguay leh Uruguay an awm thung a, an inkhelh kual hnuah group pakhata a sang pali ten quarterfinal an khel ang.

Brazil an ṭha
Neymar, Thiago Silva, Roberto Firmino, Gabriel Jesus, Casemiro leh Marquinhos te awmna an nih avangin Brazil hi champion tura rinkai ber tia sawi ngam an ni a, a thlengtu an nih bakah champion lai an nih avangin inrintawkna an nei sang zual dawn.

Copa America hnuhnung berah khan hliam vangin Neymar a inlan thei lo. Tite-a'n team nghet tak a din tawh avangin World Cup qualifier lamah pawh a zawna match nga chak lai an ni a, forward Neymar awm hian phurna a siam belh ngei ang.

Brazil hi Wolrd Cup qualifier an khelh hnuhnung berah 4-2-4 angin an inrem a, tlarhmaah Jesus leh Richarlison inkawpin a sirah Neymar leh Firmino an awm thung a, an khingpui Paraguay 2-0 in an hneh; tun ṭumah pawh hetianga an inrem hi a rinawm.

Tite enkawl Brazil tan quarterfinal luh chu thil chiangsa anga sawi theih a ni, chutih rualin player zingah Copa America khelh phur lo leh an ramin a thlen duh lo an awm tih thawm a awm, boruak ṭha siam chu coach tana hna pawimawh a ni ang.

Hun hnuhnung lam
Infiamna huangah chuan infiam-mite vanglai a rei lo a, inelna hi duh hun huna khelh theih a nih loh bawk avangin nomawi chawi theihna remchang a tam lo ṭhin. Kumin Copa America pawh hi player ṭhenkhat tan chuan ram tana hun ṭha hnuhnung a ni tawh dawn.

Uruguay tlarhma lamah Edinson Cavani leh Luis Suarez an inkawp dawn, player pahnih hi kum 34 mi an ni. An kum tam deuh tawh mah se season liam ta khan an pahniha an goal khung belhkhawm chu goal 38 a ni - an la hmuhnawm dawn tih a chiang.

Chile captain Arturo Vidal pawh kum 34 mi a ni tawh, Inter Milan midfielder hian Copa America vawi li a khelhna tur a ni dawn. Ram tan hian World Cup qualifier a khelh hnuhnung pangaah goal nga a la khung thei, club aiin ram tan player ṭha zawk a nih leh a rinawm.

Lionel Messi inlan dawn
Barcelona tan La Liga nomawi 10 leh Champions League ringawt pawh pali a chawi tawh, mahse Lionel Messi-a'n Argentina tan nomawi chawi a la nei lo - kum 33 mi a ni tawh a, tun ṭum hi ram tana title lak theihna remchang hnuhnung a ni thei.

Messi hi ram tan a vannei tawk lo tih pawhin a sawi theih. Copa America final vawi thum khel tawhin a chak lo lamah a ṭang vek, 2016 khan Chile nen inhmachhawnin penalty shootout-ah a khung lo.
FIFA World Cup-ah pawh Messi hian an ram hi final a hruai thleng tawh a, mahse Germany lakah 1-0 in an vanduai. Inkhel pakhatah vanneih zauh ni se chuan Messi hi club leh ram tana player ropui bera chhal ngam a ni hial ang.

Argentina hian hlawhtlinna an chang a nih chuan an vawi 15 champion tlinna a ni dawn a, record nei ṭha ber Uruguay an nihrual chiah ang.

Ngati nge Bazil lamah?
Copa America hnuhnuhnung ber kha Brazil-in an thleng a, an champion bawk. Ruahman lawk dan chuan kuminah hian Argentina leh Colombia ten inthlen ṭawm tura tih a ni, 1983 hnua ram pahnihin an in thlen ṭawm lehna hmasa tur a ni hial.

Mahse, South America khawmualpuiah coronavirus a la hluar. May thla laihawl khan a thleng tura tih pakhat zawk Colombia chu an inhnukdawk, ram chhungah inelna lian thleng lo tura duhtu an tam bakah nawrna a nasat vang a ni.

Argentina chu inelna zawng zawng thleng tura hnawn an ni a, mahse thu a chiang thei lo. North America lamah khelh dan pawh an ngaihtuah hman hial. Argentina pawh hri leng vangin an tlawmngai thei lo, inelna neih hma kar hnih lek la awmah an inhnukdawk ve leh.

South American Football Confederation (CONMEBOL) tan a luhai thlak takzet ang tih a chiang. Hun tepter tawh takah Brazil hi hnawn an ni a, hri leng tuar nasa ni mah se tun hnaiah inelna lian an thlen avangin hmunhma an nei ṭha.

Brazil hian hri leng a tuar nasa a, nimin thleng khan hri kai 17,215,159 awmin mi 482,135 zet an thi tawh. United States (614,007) tih lohah chuan hri leng vanga mitthi tamna hmun a ni. Mipui leh football player zingah ngei pawh dodaltu awm mah se an thleng tlang dawn ta a ni.

Stadium panga
Brazil sorkar leh Brazilian Football Confederation chuan June 1, Thawhlehni khan Copa America khelhna tur stadium panga an tichiang. Khawpui pathum - Brasilia, Goiania, Cuiaba leh Rio de Janeiro-a innghat Maracana, Mane Garrincha, Pantanal, Olimpico leh Nilton Santos-ah te an khel ang.

Match hmasa ber hi Mane Garrincha-ah Brazil leh Venezuela ten an khel ang, a hmawr bawkna chu stadium lian leh hmingthang, an chhuanvawr ni bawk Maracana-ah khelh a ni thung dawn. Final khelhna tur Maracana Stadium hi Rio khawpuia awm niin kum 1950 khan an hawng a, tunah hian mipui 78,838 zet an leng. 2016 Summer Olympic neihna hmun kha a ni a; 1989 leh 2019 khan Copa America a lo thleng tawh bawk.