Krejcikova thawnthu a la tawp mai lo

French Open khelh laia hmeichhe player langsar an zuih ral zo tawh a, hriat hlawh loh Barbora Krejcikova erawhin thawnthu ngaihnawm a la ziak chhunzawm zel - zanin dar 6:30 hian Anastasia Pavlyuchenkova nen nomawi an inchuh ang.

Ningani zan semifinal inkhelah Krejcikova hian darkar hnih chuang hnuah Maria Sakkari chu 7-5, 4-6, 9-7 in a hneh a, semifinal inkhel dangah Pavlyuchenkova chuan Tamara Zidansek lakah 7-5, 6-3 in hnehna a chang ve bawk.

Kum 25 mi Krejcikova hi world number 114-na daih a ni a, tun hma lamin Grand Slam nomawi chawi chu sawi loh final pawh a la khel phak ngai lo hrim hrim zawk; a khingpui Sakkari lakah hian match point hmasa a inchhanhim hnuah a lehthal.

Czech Republic nula Krejcikova chuan, "Naupang ka nih lai aṭang tawhin inhnehtawk taka inkhelh hi nuam ka ti ṭhin. Semifinal-ah khan chak lo pawh ni ila ka lawm tawk tho ang, a chhan chu ka theihtawp ka chhuah tawh vang a ni.

"French Open final ka khel tur hi a mak ta ti, a tak ngeiin a lo thleng ta mai si. Final-ah pawh rinkai ka ni dawn lo, kei chuan point khat hmu tur ringawt pawhin ka beih leh fat fat a ngai dawn," tiin a sawi.

Kum 29 mi Pavlyuchenkova erawhin major tournament hi vawi 52 a khel tawh a, amaherawhchu final hi a la thleng ngai bik lo. Tennis khel tam leh tawnhriat ngah zawk ni mah se final boruak bikah chuan an inang tawk dawn.

Russian player Pavlyuchenkova chuan, "Kar hnih chhung chawlh mumal nei loin kan inkhel ta, match hautak zel a nih avangin taksa a chau tawh, chutih rualin final luh boruak chuan engkim a thlak thleng ni berin ka hria," tiin a sawi.