Pathianni zanah Netherlands leh Ukraine

World Cup 2014-a pathumna a nih hnua a vawi khat nan Netherlands chu ram inelna lianah an inlan dawn. Pathianni zan dar 12:30 hian Oranje hian Euro 2020-a an match hmasa berah Ukraine an hmachhawn ang.

Frank de Boer hote hi tun hnaiah result an neih ṭhat loh avangin champion tura rinkai an ni pha lo a, amaherawhchu an muala an khelh dawn avang leh an awmna group a fuh avangin knockout stage lut ngei tura beisei an ni.

Group C-ah Austria leh North Macedonia te an awm bawk a, anni pahnih hi Pathianni zan dar 9:30 hian Bucharest-ah an inkhel ang.

Oranje an ṭha em?
Netherlands hian hliam vangin defender ṭha Virgil van Dijk leh Donny Van de Beek te an chhawr thei dawn lo a, Covid-19 positive vangin keeper Jasper Cillessen an ko lo bawk.

Amaherawhchu Oranje squad hi bihchian chuan a la ṭha hle. Liverpool defender Virgil van Dijk awm lo mah se Serie A best defender Stefan de Vrij leh Juventus defender Matthijs de Ligt an la kawl.

De Boer hian 5-3-2 a hmang thiam a, De Vrij leh De Ligt te kianga ding turin Daley Blind, Nathan Ake leh Ajax rawlthar Jurrien Timber te an khawng ṭha viau.

Knockout-ah chuan tlarhnung phui ṭhat a pawimawh hmasa a, a dawtah chuan goal khungtu a ngai. Tun hnaiah Oranje forward Memphis Depay ke a hmui a, Wolfsburg forward Wout Weghorst-a awm bawk.

Midfield-ah team tana ṭangkai chi Georginio Wijnaldum leh player fing Frenkie de Jong te an awm a, team pangngai tak an ni. Oranje hi group stage chauh ni loin last 16-ah pawh team nem an hmachhawn thei a, pressure an nei lo bawk nen stage sang tak thleng thei dinhmunah an ding.

Shevchenko-a hote
Ukraine hi Andriy Shevchenko kaihhruai an ni a, Euro 2016-ah khan group stage-ah an arte lu kawn a, FIFA World Cup 2018 an khel pha lo bawk. Amaherawhchu Nations League B-ah Ukraine hi Czech Republic leh Slovakia chungah an awm a, tun ṭum Euro khel tur zawnnaah pawh hian champion lai Portugal chungah an awm.

Shevchenko hote hian kumin March thla khan World Cup khel tur zawnnaah France an chelh a, Netherlands tan pawh harsatna an thlen thei ang. Ukraine hian Manchester City player Oleksandr Zinchenko an kawl a, West Ham midfielder Andriy Yarmolenko pawh hi ram tan chuan player ṭha bik an ni.

Chutihrualin tun Euro-ah erawh Ukraine hi an jersey vangin thawm an nei lian zawk a, an jersey hmaah an ram map dahin Russia ram chhunga mi Crimean Peninsula an dah avangin ram pahnih inkarah boruak a nun phah a, an result-ah eng zawngin nge a nghawng dawn tih chu Netherlands nen a hriat ang.