Euro vawi khat khelhna tur North Macedonia

North Macedonia chuan a vawi khat nan European Championship an khel dawn a, Pathianni zan dar 9:30 hian Bucharest-ah Austria an hmachhawn ang.

Kum 1991 khan North Macedonia hi Yugoslavia aṭangin an in dang a, kum 1994-ah FIFA leh UEFA hnuaiah member a ni. Ram anga official match an khelhna hmasak ber chu October 13, 1993 kha niin Slovenia 4-1 in an hneh.

Mi nuai 20 vel chenna North Macedonia hi team chhe tak chu an ni lo a, amaherawhchu inelna lian khel tur em chuan an ṭha tawk lo. Nations League zarah chance ṭha an nei a, an hmang ṭangkai.

Euro 2020-ah hian qualifier hmangin team 20 an tel a, team li dang hi Nations League hmangin an zawng. North Macedonia hi League D-ah awmin semifinal-ah Kosovo 2-1 in an hneh a, final-ah Georgia 1-0 in an hneh.

Final-a goal pawimawh khugtu hi Goran Pandev a ni a, Inter Milan forward hlui hi North Macedonia-ah chuan an pathian biak lo chauh. Euro khelh theihna tur goal pawimawh a khung leh bawk avangin Pandev hi an ngaisang lehzual a, kum 37 mi a nih tawh avangin football khelh a chawlhsan hnai. Macedonian player-te hian an ram leh Pandev-a tan sang tak thlen an tum ang.

North Macedonia leh Austria te hi qualifier-ah an awm dun tawh a, David Alaba telna team Austria hian 4-1 leh 2-1 in an hneh a ni.