Bucks an la tlawm lo

NBA Eastern Conference semifinal khelh laiah Milwaukee Bucks an la tlawm bik lo. Nimin zing inkhelah Bucks hian Brooklyn Nets chu 86-83 in an hneh a, best of seven series-ah Bucks hi 2-1 in an la hniam zawk.

Champion tum Nets hian game hmasa pahnih an lak avangin inrintawkna an nei sang. Second 83 chauh awm tawhah point thumin an la sang zawk a, an dinhmun a ṭha hman hle.

Mahse, thih tha a bei Bucks lam an tlawm duh bik lo, zawi muanga hnaih zelin 11.4 seconds chauh awm tawhah Jrue Holiday-a'n basket rawn neiin an chakpui a, tlawm tur anga an lan hnuah a vannei zawkah an ṭang.

Milwaukee tan Khris Middleton-a'n point 35 a nei a, an thiampuipa Giannis Antetokounmpo-a'n point 33 a nei bawk a, player dang zingah point 10 nei tling awm lo mah se an basket an ven ṭhat miau avangin an chak.

Nets lamin hliam vangin James Harden an la chhawr thei lo a, forward Kevin Durant (30 points) leh Kyrie Irving (22) te khel ṭha thawkhat viau mah se chak nan a tawk zo lo. June 13, Pathianni zan dar 13:30-ah game 4 an khel leh ang.

Nimin zing inkhel dangah Utah Jazz chuan Los Angeles Clippers 117-111 in an hneh a, seeded pakhatna Jazz hi series-ah 2-0 in an sang zawk. An chak theih nan hian Donovan Mitchel chuan point 37 zet a nei.

June 13, Pathianni zing dar 6:00-ah game 3 an khel zui leh dawn a, vawi li chak hmasa zawk an tlang dawn avangin Jazz dinhmun a ṭha tawh. Clippers tan an chak lo leh a nih chuan thawh chhuah a harsa tawh ang.