Dortmund -in Man United dilna an hnawl

Nikum nipui bazara thil thleng bawk kha Manchester United leh Borussia Dortmund ten an chhunzawm a, English winger Jadon Sancho lak tumin hma an la leh ta.

Manchester United leh Sancho te hian mimal contract leh agent hlawh thlengin inremna an nei tawh a, Borussia Dortmund nen erawh kum liam ta ang thoin an la inrem thei lo.

English club hian pound maktaduai 67-in Sancho lei an dil a, Dortmund chuan tun nipuia dilna hmasa ber hi an hnawl. German club hian pound maktaduai 77.5 bakah bonus pound maktaduai 4.25 an beisei a ni.

Khawthlang media-te tarlan danin German club hi Man United lam bonus pek tum zatah an hmin lo a, English club-in kum nga chhunga pek fel an duh laiin Dormtund-in kum li chhung bak an phal lo bawk.

Nikum khan Borussia Dortmund hi an phalna zat an tawlh hniam duh lo a, man man taka lei tumtu Man United an hlawhchham. English club hian chetsual nawn an duh lo a, Sancho hi an duh tak tak a nih chuan an ngamna zat hi an pun ngei a ṭul a ang.

Borussia Dortmund hian player ṭha an kawl hnem a, Sancho bakah hian Erling Braut Haaland leh Jude Bellingham te an kawl. German club hian Haaland leh Bellingham te hi tun nipui bazarah hralh an phal dawn lo a, Sancho chiah hi an pathum zinga hralh an phal awmchhun a ni.