Wijnaldum-a'n PSG a zawm

Barcelona nen rei tak sawizawm an nih hnuah Georginio Wijnaldum-a'n a ngaihdan a thlak a, Dutch midfielder hian kum thum chhung atan Paris St-Germain a zawm.

Netherlands international hi Liverpool chuan contract thar ziahpui tum mah se a beisei ang zat an pe thei lo a, a contract zawh ruala chhuah a thlang - Barcelona an lo lang nghal a, Catalan club hi a zawm mai rinna a lian hman hle.

Mahse, Dutch chanchinbu De Telegraaf-in an tarlan dan chuan PSG hian chhiah pek vek hnuah kar khata £165,000 hlawh turin Wijnaldum hi an sawm a, Barca aiin a thlang ta zawk.

Liverpool-a player hlawh hnem ber Mohamed Salah-a'n kar khatah £200,000 a hlawh mek a, tah hian chhiah pek nen chhut tel vek a ni thung - Wijnaldum-a'n PSG-a a hlawh zat hi chhiah chhut tel chuan £311,000 vel a ni dawn tihna a ni!

Anfield-a £75,000 hlawh anga an sawi Wijnaldum chuan, "Europe-a team ṭha ber pawl ka zawm a, ka tui halna leh inpekna zawng zawng he club hmachhawp phurawm tak tan hian pek vek ka duh a ni," a ti.

Kum 30 mi Wijnaldum-a'n PSG zawm a thlan chhan hi sum vang ni pakhat mah se coach Mauricio Pochettino vang nia sawi a ni bawk a, Gini hian kum 2016-a pound maktaduai 25-a Newcastle United aṭanga Liverpool-a zawm hma khan Poch hi a lo fak viau tawh.

Netherlands tan vawi 75 inlana goal 22 khung thei Gini hian Liverpool tan match 237 khelin goal 22 a khung a, assist vawi 16 a nei - a inhliam ngai meuh lo a, engtiklai pawha rin ngam a nihna chu a hlutna a ni.

Reds tan hian Premier League, Champions League, UEFA Super Cup leh FIFA Club World Cup-ah a champion hman.