Russia hmaah Belgium fiahna

Euro 2020 champion rinkai zingah Belgium an tel a, Kevin de Bruyne telna team hi ṭum dang ang thoin champion tura ringtu an tam hle. Zanin dar 9:30 hian Red Devils hian Russia hmaah fiahna an hmachhawn dawn.

Russia hi team nem zawka ngaih ni mah se inkhelhna hmun tur hi St Petersburg a ni dawn a, FIFA ranking number 1 Belgium tan hna a awlsam lo ang.

KDB leh Hazard?
Belgium player pawimawh Eden Hazard leh Kevin De Bruyne te inhliam vangin bul an ṭan theih a rinawm lo a, amaherawhchu player ṭha an la kat nuk avangin Roberto Martinez hoten point thum an hlawhchhuah theih a rinawm.

Tlarhmaa awm tur Romelu Lukaku hian Serie A-ah Inter Milan a champion pui a, league-ah goal 24 ngawt a khung. Lukaku hian Belgium tan pawh goal 60 zet a khung tawh a ni.

Lukaku kawppui tura ngaih Jérémy Doku hi kum 19 mi lek a ni a, 5ft 7in leka sang ni mah se Rennes forward hi a tlan chak bakah ball a thiam avangin Belgium tlarhma tichaktu a ni thei ang.

De Bruyne leh Hazard an dam phei chuan Belgium tlarhma an ngaihtuah awm lo a, Jan Vertonghen hoa ding tur tlarhnung lam hi tun inelnaa Belgium dinhmun hriltu tur a ni thei ang.

Mualneitu Russia
Russia coach Stanislav Cherchesov chuan, "Qualifier-ah kan intum tawh a, team ṭha tak an ni," tiin a sawi a, qualifier-ah hian Belgium hian Russia hi 3-1 leh 4-1 in an hneh. Red Devils hian an khingpui zawng zawng an hneh vek a, Russia hian Belgium tih loh an khingpui dang (Scotland tiamin) hneh ve vekin Euro khel turin an tling.

World Cup 2018 kha Russia hian an thleng a, Cherchesov-a ho hian Russia hi an che ṭha hle. Last 16-ah Spain an hneh a, quarterfinal-ah Croatia lakah penalty shootout hmangin an vanduai. Euro 2020-ah pawh Russia hian defensive game bawk an khelh a rinawm a, Belgium tan sut tlang an harsa ang.

World Cup-a star player Aleksandr Golovin-a'n kum 25 a tling tawh a, tawnhriat nei ṭha striker kum 32 mi Artem Dzyuba an kawl bawk avangin counter attack-ah pawh an hlauhawm viau turah a ngaih theih a ni.

Bul ṭan tura beisei
Belgium: Courtois; Alderweireld, Vertonghen, Denayer; Meunier, Dendoncker, Tielemans, T Hazard; Mertens, Lukaku, Doku

Russia: Shunin; Mário Fernandes, Barinov, Dzhikiya, Semenov, Karavaev; Zobnin, Ozdoev, Golovin; Miranchuk; Dzyuba