Covid-19 buaina kara Euro kalpui dan tur

UEFA-in ṭum dang zawng aiin European Championship-ah dan leh hrai a duang kim a, Euro 2020-ah hian Covid-19 chungchang dan duan tel a ni.

Covid-19 vanga buai team an awm a nih chuan a hnuaia mi ang hian dan an siam.

i) Team emaw team zinga mimal ang emawa inkhung hran ngai an awm a, inelna kaltlangpui tur a nih chuan inkhel turin player 13 tal an neih a ṭul dawn a, chung zinga pakhat chu goalkeeper a ni tur a ni. Player 13 hi Covid-19 test-ah an negative vek a ngai a, UEFA dan an zawm vek tur a ni bawk.

ii) Covid-19 vanga buai team-te hian player 13 an daih lo a, darkar 48 chhunga chinfel theih a nih chuan UEFA-in inkhelh hun leh hmun sawn turin thuneihna an nei ang.

iii) Match hi sawn theih a nih loh chuan UEFA Control, Ethics and Disciplinary Body-in thutlukna an siam ang a, player 13 daih lo team chu chak lo zawk (3-0) a puan an ni ang.

iv) Inkhel kaihruaitu tur referee zingah positive an awm a nih chuan UEFA-in match official tur an thlak ang.

Engtin zel?

Euro 2020 hi June 11-July 11 chhung khelh a ni dawn a, ni 31 chhungin match 51 a awm dawn. Covid-19 vangin team ṭhenkhatin player 13 an daih lo a nih chuan hemi daihna tur hi player a la koh belh thei dawn.

Amaherawhchu an koh belh zat chiah player hi an paih chhuah a ṭul a, an thlak thei tawh lo ang. Inelna tel hma hauhin Covid-19 vangin buaina a awm a, harsatna tawk zingah Sweden leh Spain an tel.

Spain captain Sergio Busquets a positive a, defender Diego Llorente a positive leh bawk avangin a hran hlakin mi 17 training tir an ni a. Heng zinga 11 te hi Under 21 player-te an ni.

La Roja tan chanchin lawmawm a awm a, Leeds United defender Llorente chu test nawnnaah a negative a, hemi a nih avang hian an test hmasa zawk chu 'false positive' ah an ngai.

Sweden pawhin player positive pahnih Juventus winger Dejan Kulusevski leh Bologna midfielder Mattias Svanberg te an nei a, anni pawh hi an inkhung hran a ṭul. Player positive reng reng hi ni 10 chhung an inkhung hran zel a ṭul a, inelna an hmachhawn leh hman a nih pawhin team tan buaina an ni hrim hrim.